假才子

假才子

比較政治碩士學歷,現為傳媒工作者。「假才子」是因為現在流行才子才女,但又沒人敢承認自己是假大空才子才女,故先行澄清。文章寫得不好還請見諒,畢竟我不是真才子。

2019/2/4 - 13:57

做咗 40 年官定 intern / trainee

林鄭月娥與第五屆特區政府主要官員合照(資料圖片,來源:政府新聞處,攝於 2017 年 6 月)

林鄭月娥與第五屆特區政府主要官員合照(資料圖片,來源:政府新聞處,攝於 2017 年 6 月)

有時真係唔知好笑定點,香港班官講嘢咁黑色幽默。林鄭同張建宗,兩個夾埋就嚟做咗成個世紀官的人,講話仲學習緊點做官。咁唔怪得之要押後退休年齡啦,因為做咗成世官都未學識,到退休嗰日仲係 intern/trainee。試諗下港鐵出事,班工程佬話「我仲要學習點做工程」,公院醫死人,醫生話「我仲要學習點醫人」,膠法官亂判案被上面駁回,跟住話「我仲要學習點審人」,過唔過到骨?班五毛話比時間/機會林鄭,好似比咗 40 年啦,仲要比多幾多?《無間道》都係十年又十年,冇四十年又四十年㗎,除咗有 120 歲的羅致光。又唔見話比機會/時間港獨青年。

睇返佢兩個講仲有咩要學,又係好得意。張建宗話要加強政策局間溝通,加強同政黨溝通,要從市民角度作「現實測試」。以前有前輩教落,官員講嘢要調轉嚟睇,話依家要做乜乜乜,就即係以前冇做到乜乜乜,例如習總強調解放軍要做到「戰之必勝」,即係依家未做到啦。所以張建宗咁講,就即係以前政策局間係冇溝通,政府同政黨係冇溝通,政策唔係從市民角度出發,係做緊「非現實測試」(whatever that means)。咁樣逆向思想一下,我就直頭驚啦,原來你做咗 40 年官都係唔同人溝通,唔從市民角度出發,做「非現實測試」㗎?喂當日你同林鄭上台,傳統泛民話你地好識溝通格?突然比返哂先生呀?

林鄭呢,就話要學習謙卑,唔要精英主義,咁即係話自己以往唔謙卑同精英主義啦。我就試下代入佢角色,以前佢見到其他人時心裡面 OS 係點樣藐人,例如:「唓依條友都唔係小學考第一」「唓依條友都唔係讀港大」「唓依條友都唔係一考 AO 就中」。咁我就好有興趣知佢以往係點睇曾蔭權啦,因為眾所周知佢冇讀大學,係考咗入政府之後先去哈佛 take 個碩士 course 㗎嘛。但佢點睇曾俊華依個 MIT 畢業生呢,我哋就知啦,因為佢自爆過「佢檯面乜都冇」(i.e. 都唔知係咪冇嘢做)「成日上 FB 同市民溝通」(i.e. 係咪吞緊 pok)。佢見到老董,可能心裡又藐人「超,二世祖死好命,唔係有大陸照顧你晨早破咗產啦」。

廣告

 

附錄:現屆政府主要官員出任官員/公職人員時間

林鄭月娥 1980 年加入 AO 職系
張建宗 1972 年加入新聞處,1979 年轉入 AO 職系
陳茂波 2008 年當選立法會議員,2012 年出任局長
鄭若驊 2018 年出任司長,之前多次出任公職
黃錦星 2012 年出任局長
楊偉雄 2015 年出任局長
劉江華 1996 年當選臨立會成員,2012 年出任副局長
劉怡翔 1979 年加入 AO 職系
羅致光 1995 年當選立法局議員,多次出任公職,2017 年出任局長
李家超 1977 年考入警隊,2007 年升至助理處長,2012 年出任副局長
陳帆 1982 年加入政府做工程師,2009 年升至副署長,2017 年出任局長
陳肇始 2012 年出任副局長
羅智光(公務員) 1980 年加入 AO 職系
邱騰華 1981 年加入 AO 職系
黃偉綸 1985 年加入 AO 職系
楊潤雄 1992 年加入 AO 職系
聶德權 1986 年加入 AO 職系

 

作者網誌