立場新聞 Stand News

免稅準則莫搬龍門ㅤ中聯辦立即公開私竇名單!!!

2020/4/24 — 20:34

作者製圖

作者製圖

回應中聯辦首度放風批評眾志查冊

香港眾志早前發表《中聯辦十八區私竇大起底》,盤點咗中聯辦而家全港擁有 757 個物業,呢個數應該暫時係全港最齊嘅數,過去傳媒一直估係 500 個物業左右。唔知係咪條數太準確啦,中聯辦今日特登向《星島》同埋《頭條》吹風,首度放風回應眾志查冊報告,話不滿我地披露中聯辦物業信息,對員工生命財產安全構成潛在威脅,話係「惡意披露」(???)……

查實我地拎到嘅物業資訊,只係靠查冊嘅基本功夫,對有研究同偵查經驗嘅人嚟講,簡直係手板眼見工夫,正如過去間唔中都有傳媒報道中聯辦買物業。或者好似處理中共武漢肺炎疫情一樣,中聯辦習慣所有嘢收收埋埋、亳無透明度可言。講真如果真係惡意呀,就晨早公布哂所有具體地址啦,唔駛將個樓層寫成「高層/中層/低層」啦。

廣告

事實上,特區政府所有問責官員都要申報地址,全部公務員同紀律部隊宿舍亦是公開資料,又唔見有人批評「對員工的生命財產安全構成潛在威脅」或者「侵犯中聯辦員工私隱」。如果唔係咁見得光,又怕咩比人知呢?又再一次反映中聯辦作為香港「太上皇」自以為高人一等。

講返個問題核心,就係香港政府免咗中聯辦成兩億稅!但,審批標準前後不一,政府上年回覆立法會議員譚文豪同埋張超雄(編號 FSTB (Tsy) 021、FSTB (Tsy) 097),都係強調中聯辦子公司買物業用作***員工宿舍***先會免稅,但日前財經事務及庫務局發言人已經立即改口,竟然話審批免稅時只睇身份,「與物業用途無關」,明顯暗渡陳倉偷偷「搬龍門放寬免稅資格」,令人質疑港府為中共駐港機構提供更多政策優惠,方便中共機構在港大舉擴張。

廣告

講真,中聯辦買樓免咗幾多印花稅,涉及重大公共財政運用,點解唔可以討論?過去 23 年,政府點樣審批駐港機構,完全係「黑箱作業」,政府頂多只係提供走稅金額,但從來都無清楚交代過具體邊啲物業有免稅。事後亦無途徑監察返啲免稅物業,到底有冇被高額轉租?唔好忘記,呢 2 億全部都係公帑,係無問香港人意願、由納稅人荷包抽出嚟嘅,走稅走成 2 億,點解唔拎去派返俾香港人好過?

更重要嘅係,今次查冊發現,喺唔受公眾監督、透明度低嘅情況下,中聯辦已經變成第二權力中心,咁多個中聯辦物業,總有一間喺你左近。我唔知道公佈物業地圖,對中聯辦國安嘅生命財產有咩影響啦,只係知道一直以嚟中聯辦同港澳辦嘅所作所為,尤其近日超釋《基本法》 第 22 條嘅舉動,都對香港人構成威脅。

所以呢,香港眾志嚴正要求,中聯辦同埋港府與其鬼崇向傳媒放風,不如立刻開誠布公,公開中聯辦及其子公司免稅物業清單。

 

政府回覆立法會議員
https://www.ird.gov.hk/chi/pdf/2019/fstb_036.pdf
https://www.ird.gov.hk/chi/pdf/2018/fstb_021.pdf

中聯辦十八區私竇大起底
研究報告:bit.ly/cloreport
物業地圖:bit.ly/lopropertymap

作者 Facebook

發表意見