立場新聞 Stand News

公開考試所為何事?

2020/5/20 — 13:02

【文:徐家健】

取消題目單嘢,有個觀點不吐不快。

首先,同大家分享一下芝大經濟系考試嘅一個傳統。同其他頂尖學府有啲唔同,呢度比較多諾貝爾獎得主教一年班,而我哋一年班亦比較注重考試。經濟同歷史唔同?芝大有憑經濟史攞諾貝爾獎嘅老師喺度教過書。

廣告

芝大考試傳統之一,係 TFU 問題,即係 True/False/Uncertain 嘅是非題。要留意嘅係,除咗「是」同「非」,仲有「唔肯定」呢個選項。另一點係,只答「是」或「非」或者「唔肯定」,啱好錯好,「齋屌唔畀橋」係冇分嘅。

背後邏輯係乜?世上好多問題,冇話下下「大是大非」,亦可以「今是昨非」。仲有,「不知為不知,是知也」。更緊要嘅係,其實係「是」與「非」答啱答錯根本唔係最重要,答啱唔解釋冇分,解釋得差會好低分,答錯解釋得有趣又可以攞高分。

廣告

毒品嘅禍害、禁毒嘅過程,大事大非喇啩?我隨便就可以攞條有關嘅 TFU 出嚟:

If the demand for illegal drugs is inelastic, then an intervention that seizes and destroys 10% of drug production will raise the profits of drug suppliers.

呢條禁毒是非題,話銷毀毒品會令毒販賺多啲,非常有「引導性」,亦冇交待歷史背景,即係放之四海而皆準。所謂「利」如何衡量?用「賺多啲」去衡量。對誰人有「利」?對毒販有利。但我想話你知,呢條是非題嘅「偏頗設題」係特登嘅,而且係特登保障考生嘅利益。

今日,我唔係同你講大是大非,亦唔係同你講仁義道德。有腦諗嘢嘅你,請先企起身諗諗。出是非題,條條答案都要係「是」,仲考乜春?出試題仲醒到畀哂啲啱嘅資料做參考,你估而家考書法咩?邊個唔識答「是」,然後將啲「全面客觀持平」嘅資料照抄一次當分析。畀個個學生都捉到你路,有利冇弊嗰個係邊?係改卷嗰個囉。想真係考學生,睇下邊個真係有讀書,梗係要久唔久「引導」下佢答錯,呢啲唔係 trick question,係要分邊啲學生有溫書、肯用腦。咁嘅問題,唔使我呢啲大學學者慢慢梳理,要學生廿分鐘內「就自己所知」處理亦十分有意義。

而家你坐喺度一句話取消就取消。有啲學生用咗廿分鐘去答呢條題目,有啲用咗兩分鐘。用廿分鐘嗰個,可以係啱啱去完袓國交流嘅愛國愛黨好青年,用足廿分鐘去反駁日本皇軍有幾仆街。用兩分鐘嗰個,一句「利多於弊」之後,將試題畀嘅資料照抄一次當解釋。DQ 條題,就係將一個愛國愛黨好青年,同一個坐住個腦嘅考試機器一視同仁,公平咩?

作者 Facebook

發表意見