立場新聞 Stand News

六七暴動

2021/2/5 — 14:33

六七暴動。

六七暴動。

「誰控制過去就控制未來,誰控制現在就控制過去。」

通識科近排宣布大改革,由原本嘅六大單元(個人成長與人際關係、今日香港、現代中國、全球化、公共衛生、能源科技與環境),變為三大主題:一國兩制下的香港、改革開放以來的國家、互聯相依的當代世界,全科有成 3 分 2 嘅課堂時間都係教授中國嘅課題。據《立場新聞》報道,有關通識課程嘅文件中,都見唔到「批判」二字。當年 2012「推倒」嘅國民教育,係 2021 年重新上路,推出嘅比當年更「國教」。曾經強調要批判思考嘅通識科,變成依家幾乎只講中國嘅國情教育。

其實最好嘅教育應該要存在有理據嘅討論,理性對話,有發問,再而去審視事情合唔合理。若果有人想只令你接收得局部信息,就係想你唔去思考,只按佢意思去諗嘢。而香港歷史上嘅六七暴動,就因社會大眾只局限於相信當時左派大台嘅說話,無對社會發生緊嘅事加以分析,令悲劇連場發生。對於六七暴動嘅詳情大家上網就咁打依四隻字已經有好多相關資料,所以係度就唔詳細講;若果唔想睇文字,想睇影片嘅一樣有,《消失的檔案》。依套紀錄片電影未係香港上過映,只係喺社區上有多場嘅放映會。睇過羅恩惠導演一個訪問,羅恩惠導演唔係唔想係戲院到播,而係因為社會氣氛唔容許依部電影上映,背後嘅無形之手令各大戲院都唔肯上。連《十年》都上到映,但《消失的檔案》就只能做社區放映,單憑依個原因,就好應該要睇依套紀錄電影。

廣告

頭先提過六七暴動發生過連場慘劇,係因為當時民眾受到中國大陸文革極左思潮影響,形成有一股「寧左勿右」風氣,而誓要「反英抗暴」。民眾盲目跟住左派大台,令暴動愈演愈烈,出現放火放炸彈暗殺行為,最後令無辜市民喪生。六七暴動總死亡人數 51 人,受傷嘅有 832 人。《我與香港地下黨》作者梁慕嫻,坦言當年曾經對左派嘅激烈手法係心內邊有懷疑過,但當領導層用「階級鬥爭」做理由,當時嘅梁慕嫻就安然接受咗依一切。

未來要愛國嘅「通識教育」以新中國成立後做主軸,會帶香港社會走向邊?

廣告

香港官方層面可以話無重視過六七暴動嘅歷史。一方面殖民地政府刻意去歷史化,對政治敏感嘅議題避重就輕;至於對左派嚟講,六七暴動唔係一段光彩嘅歷史,仲令到暴動後嘅左派勢力係香港大減,咁樣俾你都唔會想拎出嚟講,最好唔記得添。所以,係香港社會上,特別年青嘅一代好可能都唔知六七暴動發生咗咩事。六七暴動嘅歷史可以話有被政府嘅「強制遺忘」、左派嘅「自願遺忘」,最後達到社會上嘅「自然遺忘」。當普遍市民對六七暴動遺忘到令事件性質模糊咗後,六七暴動可能日後唔再係「六七暴動」,而係「反英抗暴」。楊光係當年六七暴動左派大台領袖,好多老一輩嘅市民仍然對當年發生嘅猶有餘悸,不過 2001 年香港特區政府就向六七暴動領袖楊光,頒發最高榮譽嘅大紫荊勳章。

「人類對抗權力的鬥爭,就是記憶與遺忘的鬥爭」。

六七暴動嘅歷史都成半個世紀前,不過當你嘗試睇返依段歷史,你唔會覺得陌生,因為好多字眼你已經聽過晒。「催淚彈」、「非法集會」、「被警察毆打致死」、「緊急法令」、「北京作好準備隨時收回香港」、「武裝中國民兵越境至沙頭角」、「鬥爭費」、「三罷」、「懷疑炸彈物體」、「汽油彈」等等。

作者 MeWe / IG

發表意見