立場新聞 Stand News

再談基本法 22 條

2020/4/19 — 16:16

【文:財奴】

上月筆者發表咗《奪立法會控制權 定港版反滲透法》一文,提到要為基本法 22 條本地立法,阻止內地機構干預香港嘅選舉。估唔到不足一個月,經中聯辦及港澳辦自行「釋法」,令到基本法22條成為熱話。

兩辦撒賴將自己剔出基本法 22 條嘅管轄範圍,可算是將中共無賴嘅本色發揮到極致。而特區政府跟足口徑,連環出稿推翻自己講過嘅嘢,食相之難睇,實在令港人蒙羞。然而特府曾多次於官方文件及立法會表示中聯辦屬中央跟據基本法 22 條在香港設立嘅機構,要受 22 條規管,如今前言不對後語,事實必然有一次係講大話,當中涉及嘅官員有否誤導公眾及立法會、有無構成公職人員行為失當,希望泛民嘅大狀同 ICAC 認真研究。

廣告

其實基本法 22 條第 2 款規定中央於香港設立機構,須徵得香港政府同意,所以如果中聯辦係依基本法 22 條成立,特府必然會有當年向中央表示同意嘅相關文件。立法會議員應該向政府索閱有關文件,以供 fact check。當然,如今政府話中聯辦唔係 22 條所指嘅中央機構,可大條道理話當年佢成立時無經港府同意,但議員仍然值得向政府提問,起碼迫有關官員再講一次大話,到將來「審判日」時可以嚟個大清算。

今次嘅風波,再次引證定立港版反滲透法嘅必要性。只要本地嘅法例清楚列明要規管嘅對象包括中聯辦,不管佢係唔係受 22 條監管,都可以阻止佢哋干預香港嘅選舉,並且可以將中央嘅官員送往香港法院,彰顯香港嘅司法獨立(如果仲有)。我哋太多嘢要守住,要守住基本法 23 條、要守住送中條例、要守住國歌法,可唔可以有一次,只係一次,我哋主動出擊,立法去懲罰嗰啲破壞一國兩制嘅大陸官員呢?

廣告

發表意見