立場新聞 Stand News

初選現求變心切ㅤ抱殘守缺必遭摒棄

2020/7/14 — 15:32

7 月 12 日,民主派初選第二日,一眾參選人於大埔設街站拉票。

7 月 12 日,民主派初選第二日,一眾參選人於大埔設街站拉票。

民主派初選初步結果出爐,除咗投票人數令人大跌眼鏡,投票結果令本土派抬頭,展示強烈民意傾向:  

1. 選民嘅眼睛係雪亮嘅,初選嘅每一票唔係投俾黨,係投俾個人。選民睇嘅唔係某一個候選人屬於咩黨,而係佢本身作為一個政治人物嘅路線係乜同埋做咗啲乜嘢。投訴初選、網上投票對大黨不利完全係無稽之談,同為民主黨嘅鄺俊宇、許智峯都係當區票王;現任立法會議員亦都唔係個個落馬,九西嘅毛孟靜仍然獲第三多票數。證明一切不在於政黨和投票方式,只在於個人質素。

2. 初選結果展現咗香港人求變的強烈願望,本土派新勢力嘅抬頭,代議士年輕化,著重整體論述多於民生政策,立場鮮明。新時代已到來臨,只有敢於面對新挑戰,新環境,新氣候方會獲得市民授權;相反,仍然抱殘守缺者必遭時代摒棄。同樣係社民連,岑子杰高票當選,長毛則完成佢嘅歷史任務,黯然落幕。胡志偉作為老泛民嘅代表、民主黨嘅主席,如果唔係 6.12 當日「我要見指揮官」勇武嘅一幕,可能連敬居末席嘅機會都無。 

廣告

3. 「Over My Dead Body」(編按:楊岳橋)雖然俾人譏笑、詬病,但仍獲高達 24,000 票,成為新東第三票多的候選人。再嬲、再詫異,都係民主的結果,證明佢仲有一定嘅支持者,而喺比例代表制下,仍然有需要 OMDB 光譜嘅聲音喺議會發聲。除咗參選人要接受初選的結果,選民都要接受民主的結果,先至係民主社會的體現。

4. 唔駛含淚投票,唔駛策略投票,真正感受民主嘅感覺真好。香港選民展現嘅係成熟嘅公民社會質素,絕對值得享有真正民主。林鄭對初選的恫嚇中聯辦的譴責,正正揭示民意是獨裁的最大制約。

廣告

 

作者 Facebook

發表意見