立場新聞 Stand News

劉家棟的遭遇告訴我,做社工折墮過做賊

2020/6/19 — 17:16

警察可以唔顧市民生命安全,亂衝向人群毆打社工!
住警察宿舍可以藏毒不起訴!
香港是甚麼的鬼國度?
港共是甚麼的鬼政府?
香港法院是甚麼鬼機構?

6 月 17 日,23歲社工劉家棟因 7.27 在元朗進行現場人道疏散,被控阻差辦公,重判入獄一年。裁判官蘇文隆拒絕上訴保釋,即時入獄,講句粗口給大家聽:「香港仲有法治!」看到新聞一刻,我還以為家棟是 7.21 白衣人護送者游乃強弟弟游乃海作品《樹大招風》,主角林家棟飾演季炳雄的角色,做賊作奸犯科。

仲講乜社會公義

廣告

社工註冊局合共 53 條《社工守則》,第四條寫明:社工有責任維護人權及促進社會公義,一位維護香港族群人權、促進社會公義的年青社工,被無理拘捕、控告,現在竟然還要收監,下星期才進行上訴保釋開庭,在獄的家棟,還叮囑大家不要放棄,可是除了基督教服務處社聯社總外,所有機構好似死哂一樣,你班坐冷氣房嘅所謂管理層,仲有無良心?去年到今年,個個一粒聲都唔出,警暴無日無止,啲青年俾人打到殘廢、抛落街、「無可疑浮上水面死亡」,一句公道話都未講過。以前啲外展仔俾黑警屈、俾黑警打,社工都仲可以投訴開記者會,而家啲死黑警連社工都亂毆,俾人毆完仲要坐監,入職嗰陣唔該一人一頂頭盔俾同事,如果唔係就告機構違反職安健條例,妄顧外展社工職業安全。陳彥霖死你地唔出聲,周梓樂死你地唔出聲,而家連社工專業底線被極權打壓,都係好似張伯倫一樣綏靖唔出聲,其實你地仲攞個牌嚟做乜春?死咗佢好過!而家乜都同中共接軌,不如好似市民建議對班黑警咁,連人工都同大陸接軌,炒哂佢地請國安,搵大陸社工接哂你地啲位咪攪掂,反正連社會公義都唔講。

咁鍾意攪交流團、咁鍾意奶共,咁鐘意叫啲年青人返大陸視察國情,而家國家嘅白色恐怖國安法嚟到,你地唔攪國安法利與弊討論?年年註冊俾六嚿,個死人註冊局除咗收會費幫佢地供樓買會址,有無維護過專業?有無捍衛過行業尊嚴?其實警政干涉,司法敗壞,連行家都保護唔到,執咗個註冊局佢,起碼大家慳返六嚿。《世界人權宣言》第八條指出:任何人當憲法或法律所賦予他的基本權利遭受侵害時,有權由合格的國家法庭對這種侵害行為作有效的補救。家棟堅守社工原則,維護服務使用者人權與人身自由,以國安法尺度,是勾結外國勢力,而家乜都同國安有關,社工守則駛唔駛加埋愛國愛黨?社工守則需唔需要重寫?需唔需要解散重選?叫哂啲愛國愛黨嘅人參選,DQ 現有委員,以確保國安法能有效執行?

廣告

仲有學院嗰啲死人犯罪學專家,除咗研究下啲𡃁仔偷嘢、青少年精神健康,對警暴同政府墮落有無研究,咁怕得罪政府,你地同文妓有乜分別呀?咁高學術水平,會唔會做吓黑警濫捕、警權過大、警員操守、警員販毒現象?叫啲社工出席你地啲把鬼研討會,喺個台就巴乜閉話社工唔認識犯罪學,而家啲警員犯罪,無理拘捕你地有無做研究呀,仆你個街!舊年反送中運動就扮勁做埋 PPRB 嗰份,暗瓦底想叫啲學生同黑警高層會面,做之前有無問清楚啲學生想唔想?做人仲有無社工風骨?

郭偉強要坐兩年

自雨傘革命後,香港帶來了一批又一批的年青政治犯,黃之鋒 21 歲入獄、冼嘉豪 22 歲入獄、劉家棟 23 歲入獄、羅冠聰 24 歲入獄、周永康 25 歲入獄、何潔泓 26 歲入獄、游蕙禎、梁天琦 27 歲入獄、黃浩銘 29 歲入獄。在港共普通法下,他們的遭遇較清代衙門審案下場更可悲。家棟如何被屈,不再作描述,請大家看新聞,要重覆描述,絕對是心靈的最大虐待。如果一個社工在現場作人道救援,疏散民眾,讓社會減低警民衝突要判監一年,持有社工註冊的工聯會暴徒郭偉強,在議會襲擊陳志全,造成實質身體傷害,起碼要坐兩年。到現在,社工註冊局仍然未對這位暴徒展開聆訊,是甚麼道理?如果唔佢駛坐監,個牌照唔吊銷,就記得提名郭偉強做優「獸」社工,因為佢重新定義社工守則,愛國愛黨,為社工界帶來新秩序。

在這失範與黑暗的社會下,社工如何走下去,與教師一樣艱難。當一批年青政治犯未來或會被國安法更兇狠打壓,也與極權戰鬥到底,社工沒有懷憂喪志的空間。當你每月月尾獲發薪金時,當中每一元都包含了青年與行家的鮮血、屈辱、甚或寶貴的性命,你唔出聲收得安樂嗎?

光復香港ㅤ時代革命
煲底之約ㅤ不見不散

 

#社總 #社工註冊局 #劉家棟 #香港仲有法治

(標題為編輯改擬)

作者 Facebook

發表意見