立場新聞 Stand News

功能組別,一票都不能少!

2020/3/3 — 17:10

【文:胡人傑 @ 前線科技人員】

筆者想大家記返起《香港人權與民主法案》,美國眾議院通過參議院版本嘅呢一幕

廣告

之前,我哋冇估到會咁順利,仲以為眾議院要幾個月時間合併參議院版本,不過眾議院並冇糾纏細節,直接通過參議院版本。再之前,我哋冇估到會咁嘅票數,仲以為只係險勝。再再之前,更加冇人估到呢個由 2014 年開始曝光嘅法案,最終會以咁嘅高度,高調通過!

一切,因為我哋寸土必爭;無論機會幾咁微細,從來冇放棄過。一切,因為好多人行出嚟,好多人流血,好多人犧牲。

廣告

然後,我哋冇放棄區議會,成績斐然。然後,特朗普簽署法案!

今日,我哋面對同一個疑惑,立會功能議席可以過半咩?

我哋唔知,冇人知,大家點知下半年會係咩境況?下半年,中国經濟真係可以翻身?下半年,中国遊客會回復絡繹不絕?下半年,中国仲可以有經濟甜頭俾香港嘅藍絲?下半年,中美貿易戰會發展到咩程度?功能組別各界,仲仍然會視中国為救星,定係剋星?今日嘅所謂建制地頭,真係咁鐵?

我哋唔知,冇人知,不過我哋可以做就係,繼續寸土必爭,盡力將功能組別嘅選民基礎染黃!

除咗爭取直選,我哋亦可以同時喺現時框架內爆破。我哋無法估計每一件事發生嘅時序,或者直選真係下半年實現,或者直選係因為我哋連功能組別都爆埋,所以會實現。我哋唔知,冇人知,但進攻功能組別會有咩損失?

如果擔心轉去功能組別會削弱超區選票量,咁大家可以放心,超區選民 [1] 數量遠遠超過功能組別 [2]。再者,參考區選,如果立會選亦有七成投票率(2016 年 58%),嗰度係講緊增加幾十萬張選票。如果仍然擔心,咁我哋叫埋啲未登記做選民嘅同路人加入,佢哋可以補充超區,數量龐大,然後我哋再呼籲八成投票率!

如果擔心積極參與功能組別會削弱爭取直選嘅理據,咁亦可以放心,對於中国,呢啲道理根本毫無意義,中国從來都唔可以被說服,只可以被屈服,而功能組別,就成為我哋嘅武器。對於西方政客,大家都只有興趣落注會贏嘅一邊,而唔係講極都冇成績嘅一邊,而選舉結果,就成為國際介入嘅缺口,邊個知特朗普到時又會做啲咩?

冇人可以完全預視未來,不過今日可以肯定就係,功能組別,一票都不能少!

 

[1] 地方選區:2019 年登記選民人數 413 萬,登記率 86.2%,較去年飆升 318,700 人。不過,仍然有 13.8%,即六十多萬人合資格但未登記,登記率最低為 18-20 歲組別,只得 66.4%。
[2] 功能組別:2019 年登記選民人數 229,750。

發表意見