立場新聞 Stand News

「勇武唔 care 選舉?」重點係你 care 唔 care

2019/11/23 — 16:27

【文:莫哲暐】

呢幾日都有風叫人投白票、唔好投票、唔好畀泛民食人血饅頭之類。我唔識嘢,無政治智慧,只有幾點茶餐廳阿叔見解:

(一)有人話勇武唔 care 選舉,輸咗都無所謂。其實我真係唔知,因為我無最前線嘅勇武朋友。希望聲稱勇武唔關心選舉嘅人,真係有第一手資料啦。不過無論如何,就算有勇武朋友真係唔 care,重點係你 care 唔 care。Care 的話,咁就投啦。

廣告

(二)又有人話贏選舉唔等於贏運動呀。其實全世界都知啦,等如簽聲明唔等於運動會贏,fact 來的,無乜好爭論。咁你投唔投?

(三)有泛民食人血饅頭。其實總有人唔生性。咁係咪代表所有出來選嘅都係食人血饅頭?包括學生領袖、前學生領袖、各派人馬。唔會全世界都食人血饅頭啩?

廣告

(四)政府同建制派一定會將選舉結果同運動連結。輸得多嘅話,林鄭星期一朝早一定會出來同你講:「特區政府一直保障並尊重市民行使政治權利。民主選舉嘅結果好清晰,市民已經對暴力忍無可忍,證明暴徒係唔會得逞嘅。我呼籲各界人士響應民意,支持特區政府止暴制亂。」你想見到呢一幕?

(五)The whole world is watching. 今次應該係有史以來國際社會最關注嘅一次區議會選舉。Lord David Alton 親自來香港觀選,美國政界不少人已在 Twitter 表示非常關心。外國人最鍾意睇選舉。佢哋唔會知道咩叫蛇齋餅糭,輸得勁的話,外媒就會講係主流民意開始對運動反彈。你又係咪想見到呢一幕?

(六)我真心相信勇武朋友唔會攻擊票站,根據國際經驗,只有獨裁政府請返來嘅流氓先會襲擊選民同票站。

(七)我一直覺得香港半開放政體下嘅選舉其實打擊民主化,因為有選舉就有分裂。希望今次唔會太嚴重。

 

(標題為編輯所擬)

作者 Facebook

發表意見