立場新聞 Stand News

區議員梁晃維:35+ 海市蜃樓ㅤ35- 全面抗爭 — 我的議會戰線想像

2020/6/29 — 23:18

作者製圖

作者製圖

【文:梁晃維(中西區區議員)】

無論係港島區初選論壇九龍西論壇,唔難發現有好多候選人對「35+」仍然抱有好大幻想。有人話「35+」之後,親共派同政府都要驚,都要衝;亦有人話「35+」可以炒哂班保安同秘書長,請翻游主任做保安(?);更有人覺得「35+」可以無視分組點票嘅高牆,修改法例,重光法治。

香港嘅選舉制度一向都不利反對派,今日奪取「35+」有兩個前設,就係反抗陣營嘅支持度,以及選舉嘅投票率都比 2019 年區議會選舉嘅數字為高。《国安法》後日就通過,若果接下來嘅大規模拘捕能夠激發香港人重啟街頭抗爭,令抗爭熱度重上 2019 年 11 月嘅高度的話,我哋喺支持度上,的而且確有機會能夠拎到過半議席。但呢點仲要視乎抗爭陣營能否喺初選入面選出最能夠反映整體選民意識形態分佈嘅名單,以及親共派同中間派嘅選舉部署。本來要達成「35+」嘅條件已經非常苛刻。

廣告

不過,就當我哋能夠滿足以上條件都好,政權會比反抗陣營議會過半嗎?過去幾年嘅選舉入面,政權無所不用其極,DQ 候選人、當選人,令有機會帶領香港思潮進步嘅政治人物冇辦法成為香港人嘅代議士。2020 年嘅立法會選舉,同樣嘅戲碼一定會再度上演,而喺今次選舉被 DQ 嘅人數更可能會係史上最多。唔咁悲觀去諗,Plan A 被 DQ 後,Plan B、Plan C 用跪到盡嘅方式入到議會,宣到誓,亦有可能因為喺抗爭運動嘅參與而被濫捕,總之政權一定有方法令「35+」變成「35-」。「35+」只係海市蜃樓,所有負責任嘅候選人都應該同支持者做好期望管理,而唔係再做「35+ 迷信者」,用「35+ 後想像」去比假希望香港人,去博取支持。

講咁多,「錦鯉有咩高見」?香港人由呢刻開始就要認清事實,我哋有責任去嘗試「35+」,但事實上我哋而家唔係選緊一班人入去「35+」嘅議會,而極可能係同過往 23 年一樣,一個未能過半嘅議會。直白啲講,來屆嘅代議士唔能夠虛有政綱理念,更要有喺人數劣勢之下,堅定進行議會抗爭嘅意志。又,就連黃碧雲都話一齊衝嘅今日,「堅定抗爭意志」一詞好似變得好虛,又或者冇人答到實際上會做啲乜。入到去有咩行動,好大程度取決於當時嘅情況,可能係肢體衝突,臭魚臭水,打爛火警鐘,或者係其他冇人試過嘅做法。但我相信香港人,從候選人論壇表現同埋往績,能夠分得出邊個決意成為議會之中嘅抗爭者,願意喺劣勢之中用盡一切議會制度內外可行嘅手段,為香港人拖延惡法,爭取更多嘅時間;用議會抗爭,為街頭抗爭作燃料,為國際制裁作藥引。

廣告

 

作者 Facebook

發表意見