立場新聞 Stand News

區選之後

2019/11/25 — 18:13

11.24 區議會選舉

11.24 區議會選舉

和勇不分

今次區選升格為一次全民公投,展現六月以嚟對「五大訴求,缺一不可」嘅堅實民意,並無因為多個月嚟嘅抹黑、分化而有所消散。最感動嘅係全港市民真心放下成見,唔理舊怨,即使泛民個底有幾花,即使 689 同其他居心叵測的分化 L 係選前帶風向,大部分選民都團結一致,義無反顧咁去投票,有好多相信都係「含淚投票」。

目的一致而明確,「唔係要泛民贏,只係要建制輸」。呢種負面投票嘅方式只係立場表達,完全唔代表選民真係 endorse 佢投嗰位候選人,尤其好多係完全無地區工作經驗。只係因為政府倒行逆施、黑警暴力肆虐、建制助紂為虐之下嘅抉擇,兩害相衡取其輕的權宜之計。

廣告

市民透過選票,真正做到和勇不分,不計舊惡,每一票,都係用前線手足的血換番嚟,絕不廉價,絕不輕易。希望當選嘅非建制議員唔好再一次令選民失望,將最大嘅民意「五大訴求」透過佢哋嘅職權盡力爭取,落手做好地方事務,令選民感到今次嘅決定無做錯到,否則,下年嘅立會及四年後嘅區會選舉只會帶來更大嘅民意反噬。

體現民主

廣告

超過七成一投票率嘅區選,仲係一次全民覺醒,每個選民深切了解到每一票嘅重要性,由最初登記做選民,到素人積極參選,選民呼籲身邊朋友家人投票,認真研究投票要注意嘅事項:由驗張選票、到留心多餘墨水整污糟張票、要對好身份證唔好俾人種票、到選完去現場監票……每一個選舉步驟都一絲不苟,十分認真。對於運入票站的外來票箱寸步不讓,雖然最終只係杯弓蛇影,但係不停聽到現場講「一票都唔可以有懷疑」、「呢個係程序公義嘅問題,唔係選票多少嘅問題」呢種態待正正係民主覺醒嘅象徵。中共最怕嘅就係呢種人民覺醒,對政權建制嘅懷疑係極權統治嘅最大威脅。

民主唔係由上而下嘅統治,民主係由下而上嘅民意表達,係由每一個個體用腳走出嚟,排一兩個鐘排出嚟,搭的士、飛機趕番嚟投嘅體現。「每一票都好重要」呢個唔係一個口號,今次嘅區選最能夠體現到呢份精神,係 Facebook 上寫幾隻字,每一個 share、likes,喺連登嘅辯論討論、喺 WhatsApps 拉票……如此種種,每一環都係自己嘅位置發揮緊或大或小嘅作用,係眾多嘅作用加埋先至有呢個民意海嘯嘅效果:無一個人應自我膨脹,無一個人應妄自菲薄。呢個對民主嘅覺醒,明白手上一票嘅重量,先係成個區選最大嘅意義。香港人質素正係好高,能放能收,能勇能和,一星期前戰火瀰漫,一星期後認真選舉,這向國際社會發出強烈訊息:香港值得民主。

區選只係整個戰爭入面嘅其中一個戰役,一條支線,點樣利用區選大勝後嘅資源、權力去推動五大訴求先係當務之急。如何運用區議員嘅資源去聘請留咗案底嘅手足?如何在地方建立樁腳準備日後選戰?如何將一時激起嘅民情深植成意識形態?如何擴大黃色經濟圈的規模及常態化?如何讓政治素人變成紮根地區的區議員?區選只是這些問題及長期戰線的切入點,而繼續監察住自己所選的區議員係每一個選民今日後的責任。

 

#有燈便有人
#留一口氣
#點一盞燈

發表意見