十年如一日嘅忠誠廢物

譚耀宗真係十年如一日,屹立不倒嘅應聲蟲,忠誠廢物嘅典範。

還記得十年前,當年(2011 年)無綫記者喺《新聞透視》談及遞補機制方案,記者當面質問譚耀宗:「政府提出嘅原方案,你支持。修訂嘅,你支持。唔諮詢,你哋支持。到要諮詢,你哋都支持。感覺係,你嘅立場喺邊呢?」譚耀宗一呆,似笑非笑地面容抽搐了一會。

十年後,即 2021 年嘅 8 月,譚耀宗以中國全國人大常委嘅身份前往北京參加人大常委會,去之前不停放風,先對外聲稱預料人大常委會會議要將《反外國制裁法》納入《基本法》〈附件三〉,外資反對聲音此起彼落,譚耀宗就好似皇帝前嘅太監一樣,上頭叫佢做乜,佢就自動揣摩上意,添油添醋咁講一大堆支持上意嘅說話。

一時叫人唔需要擔心,一時叫外資要深明大義,一時又要求外資向所屬國家政府施壓唔好作出「霸凌行為」,一時又話相信本地立法工作將會謹慎地進行,一時又話唔驚外資會走人,仲拍哂心口話香港個金融貿易中心地位唔會受到《反制裁法》影響。

好喇,上到去之後先知道原來中國政府決定褪軚,暫援表決《反外國制裁法》納入《基本法》〈附件三〉,譚耀宗又即刻衝出嚟,今次話唔表決唔出奇,又幫上面講盡門面說話,乜嘢叫「唔係好特別嘅情況」,乜嘢叫「過去都有試過」,跟住又話「多啲時間去研究,我覺得都好啲」。

幾日之間,由「支持表決」到「支持褪軚」。

對呢種人,用番十年前嘅問題去同佢對質,係完全無過時。

「你個立場喺邊呢?」

諗深一層,佢立場無變,佢個立場就係做忠誠嘅廢物。

 

作者 Facebook / Patreon

相關文章

    發表意見