立場新聞 Stand News

去留爭論不斷 源於抗爭意志

2020/9/19 — 12:53

作者製圖

作者製圖

立法會去留嘅問題看似達成共識,公民社會和政治人物共同以民調解決,一眾泛民主派嘅議員想繼續留低係立法會,證明自己係有價值,表明市民需要佢哋進行議會抗爭,奮力對抗不義政權嘅惡法。

唯獨民意早就已經好清晰,香港人比佢哋一眾嘅從政者行得更前、更願意承擔拒絕委任所帶來無法預測風險,共同面對不安感同加速嘅壓迫。

可惜嘅係,作為從政者嘅佢哋,比港人更為保守。佢哋用盡方法、想盡原因、諗盡藉口,來說服(欺騙)市民支持佢哋留低。

廣告

保守者卻期望以不變應萬變,不願意與港人一起承擔政治風險,拒絕委任,迎擊中共。反之,佢哋渴望以舊有方式,延續議會資源、維持政黨力量,在保守主義下嘅議會抗爭,妄想憑一黨之力來抵抗獨裁政權。

一個真正嘅代議士、抗爭者、香港人,從來都唔係用冠冕堂皇嘅說話,來證明自己嘅抗爭意志。香港人最需要嘅係以實質行動來體現抗爭意志,可以帶領香港前進嘅「政治領袖」。

廣告

遺憾嘅係,香港最多嘅係「政治從業員」,而唔係「政治領袖」。而呢啲「政治從業員」不斷賣弄危機,營造「亡港感」,來團結自己嘅支持者,保存自身嘅政治力量,卻忽視社會大眾對新一代從政者嘅期望。

然而,出現去留爭論嘅政治局面,其實都係好可悲,亦是佢哋咎由自取。歸根究底,泛民主派過去嘅一套又傾又砌、扮演假抗爭嘅政治操作,已經被市民大眾所識破、厭惡及離棄。

香港人睇穿絕望真相,深深體會到「政治從業員」永遠都係「講多過做」,做嘅時候又唔齊人,缺席重要議案、一黨投三票不同立場、支持政府委任紅官、支持中國口岸基建、與中共密室會談。這些議會嘅賣港實錄,香港人都歷歷在目。

我哋質疑嘅係「政治從業員」嘅抗爭意志,而唔係議會抗爭嘅成效。因為香港人對畸形制度下嘅立法會,係從來都冇期望;而我哋只係對代表香港人嘅代議士,感到徹底失望。

最後重申,拒絕委任,立即選舉。

    

發表意見