假才子

假才子

比較政治碩士學歷、傳媒工作者。取名「假才子」是因為潮流興才子才女,但又沒有人承認自己是假大空的偽才子才女,所以先行澄清。文章內容不好就還請見諒,畢竟我不是個正牌才子。

2020/8/25 - 19:31

又冇承擔又誤判,所以信唔過你囉

雖然筆者都寫過兩次文講我認為民主派議員留任好過不留任,但見到民主派議員自己搞到一鑊泡,都係忍唔住要鬧返次。

甚麼要做多次有公信力民調,其實路人皆見就係佢哋想留,又怕比人鬧,於是推去話做民調,以為結果會對佢哋有利,點知唔係,就唯有賴話依個民調冇公信力,我哋再做多個係有公信力嘅,仲訂下一大堆門檻,為萬一結果又係唔得就唔認數打定底。難得班學者仲幫你作埋個藉口話依家民調結果冇明顯傾向。其實民主派幾時有個規矩係民調有明顯傾向先引用?

成件事就係叫冇承擔。喂你哋係市民選出嚟㗎,每個月收緊 10 萬㗎,自己已經有立場就公開向市民說明,說服市民啦,係要咁縮骨。嗱我就唔認為議員一定要跟所謂民意行事嘅,因為邊個去定義邊個民意?全港市民的民意?民主派支持者的民意?投自己票的支持者的民意?當選本身又係咪一種民意?同埋跟民意做係咪就一定符合公眾利益?政治學上好多可以拗。所以我唔覺得議員事必要跟所謂民意。但依家係,既然你都有哂立場,仲要係一定要跟依個否則民調都輸打贏要,咁就唔該你開誠布公講啦,我係做依樣㗎啦,唔同意就下次 vote me out 啦,係要搵咁多樣過橋。

廣告

跟住,又成日誤判。開初梗係佢哋入面有人話民調實係幫我哋嘅,最多咪發動《蘋果》同班上一代學者造勢,所以先講信民調唔驚。點知搞成咁。依家咪睇到囉,其實佢哋一派的影響力已經大不如前,就算經歷過初選大敗都未醒覺。依種脫節同誤判同冇承擔咪就係點解大家依家唔信你哋囉。有人話梗係又比狗頭軍師點,我就唔知點叫狗頭軍師,只可以講個例子,N 年來佢哋個「大腦」係叫羅致光。咁依家一係就變咗冇腦,一係就搵咗個同羅致光差不多「呢」嘅新腦。正常你用人會有套準則㗎嘛,咁你搵得一個羅致光就會搵得第二個羅致光㗎啦,除非你好似共產黨咁玩大清洗。唔係個個好似劉備咁好彩,軍師一下子由孫乾簡雍爆呢做諸葛亮同龐統㗎嘛。

同埋咁落去,基本上下次個民調結果係點都係比人鬧㗎啦。突然變咗撐留任多數,會否比人話造馬?如果離任佔多數,咁你係咪真係夠膽離任呢?再唔係就話咩未過門檻又盛唔跟,又係比人鬧,咁你做民調嚟做乜 Q?所以,我支持留任都 no eye see。唔該你哋要留就講清講楚,同埋未來一年會做咩回應大家,公開承諾,好冇?

至於有人話係咪用初選勝出者組個影子議會,又係預想到好多問題。首先好明顯現任同初選個組成都差幾遠吓,點傾得埋欄呢?跟住如果你係冇約束力,咁現任嗰班係咪真係可以唔跟先?如果係有約束力,應該會有排拗到底個決議機制係點。同埋,始終初選就唔同正選,兩者出嚟投票的人都唔同,兩邊支持者又唔同,依家周街都興講 mandate,兩組人個 mandate 係咪可以相通呢?萬一有人唔服,話咁我支持者真係點喎,或者我又做個民調話點喎,咁點呀?平日立法會都會有人走票啦,依家得唔得先?尤其冇諗住連任嗰幾個。仲有功能點計呢?雖然依個比較小事。當然區議會依家新舊兩派都有合作嘅,但咁係因為區議會範圍有限,唔會有咁多兩派要拗餐飽的問題。 所以我驚如果做到太正式,會有好多問題囉。比個表大家參考。

作者製表

作者製表

 

作者 Patreon