2019/6/17 - 23:28

又暴動又唔暴動ㅤ彈出又彈入

Kenji Wong 攝

先總結一下警務暴長盧同志發言：

首先，當日「件事」唔係暴動
所以唔係所有人都係暴動

若果你有暴動行為，你就係暴動
若果你無暴動行為，你就唔係暴動呢

咁目前為止，有幾多人「暴動」？

得五個。

五個人的暴動？五個人暴動你射 150 發催淚彈 20 發布袋彈？

嗱呢單嘢唔係我跟開嘅，係現場指揮官決定，若果你唔滿意，我呼籲你哋即刻去搵警察投訴科。

完。

愈來愈明顯，本來政府寫好哂劇本，成個核心就係「暴動」。

只要「暴動」就可以武力清場，射咩都得，就可以趕人、打人、拉人，所以林鄭當日傍晚急急腳出片話係暴動，所以盧偉聰之後個日扮失憶，話自己早就定性咗係暴動云云，仲對外放風話星期三係「顏色革命」（01 咪中咗招）。

但結果北京突然轉軚，政府要急速降溫，建制中人急急跳船割席，本來揸住碌棍衝撚到最前嘅警務暴長跟車太貼，嚴重自炒。

明明晨早話咗暴動，而家又唔係暴動，但入面部份人又係暴動，部份又唔係，彈出又彈入，都係想平息民憤（但係留意返，本身暴動法律定義，係一個非法集會，一有人破壞社會安寧，個活動就係暴動，盧暴長今日近乎係亂講）。

不過，成個政府仍然係搞錯咗樣嘢，以為同人講，「放心唔告你暴動」就得，收皮啦你，大家從來唔係擔心被指控參與暴動，而係不滿警隊暴力鎮壓、對人民開槍，一係你撤回所有暴動指控，一係就準備再承受人民怒火吧。