立場新聞 Stand News

反駁對「黃色經濟圈」的攻訐

2019/12/17 — 15:41

圖片來源:龍門冰室 Facebook

圖片來源:龍門冰室 Facebook

近日抗爭戰線開始轉移到長期戰同經濟戰,「黃色經濟圈」慢慢成形,最好嘅證據就係開始引嚟對家嘅反攻,繼施永青連日發文「黃色經濟圈」唔經濟唔會成功,日前又有一個「旅美歷史學者」以〈「黃色經濟圈」撕裂香港〉為題,舉出六點,義正辭嚴咁指出「黃色經濟圈」嘅邪惡,既不公義,又違反人權,講到比傳統黃色事業更加邪惡。

文中指出「黃色經濟圈」會做成社會對立、分化,甚至撕裂,更加舉出種族隔離政策做例子,又動之以情,講咩「以後一家人齊齊整整到酒樓吃一頓飯都是一種奢望」云云。香港社會撕裂係事實,世代之間的對立存在亦都係事實,但係邊個係製造撕裂的始作俑者?係林奠為首的港共政權同以手下三萬個蒙面爪牙,而唔係「黃色經濟圈」的支持者。從六月開始,港共政權不停製造社會矛盾,對民意視而不見,用不同嘅手段係社會上造成一堆階級特權分子:擁有大傷力武器、蒙面無身份、無編號、無委任證,可喬裝成任何人士,無論做乜都唔會被追究,更有法庭禁制令去保障佢哋嘅身份、家人同宿舍,上到庭做證人都隱藏名字。林奠嘅與民為敵嘅施政同呢班武裝特權分子先係真正撕裂社會造成對立嘅主因,而唔係「黃色經濟圈」,但係作者選擇視而不見,倒果為因,「撕裂香港」呢個大功臣,除咗林奠,真係無人能夠問鼎。

再講,用家庭概念去情緒勒索自己嘅子女,講咩「唔可以再一家人坐埋一齊食飯」。子女唔係家長嘅附庸同玩具,佢哋都有自己嘅人生同思想。而事實上子女因為政見問題而被屋企人逐出家園嘅個案屢見不鮮,好似唔想一家人坐低食飯嘅唔係「黃色經濟圈」,係動輒就用「你宜家食我嘅住我嘅就要聽我講」呢啲「恩主模式」嘅家長,黃色經濟圈只係為呢班年青人提供護蔭。

廣告

「攬炒」係成場運動的終極目標,「黃色經濟圈」只係方法

另外,文中指出「黃色經濟圈」會重創香港經濟,喺中美關係緊張之下,會面臨沉船危機。呢個論點正正就係反映咗作者對「黃色經濟圈」以致成個運動嘅本質嘅不理解,而呢種嘅誤解係呢班企喺高處嘅既得利益者係普遍存在。「攬炒」係成個運動嘅核心價值,「攬炒」就係要令到政權及既得利益者受到損害,付出代價而不惜犧牲自己利益。香港人係法治上得不到公義嘅彰顯,係政制上停滯不前,係武力上不成比例嘅強弱懸殊,係話語權上嘅絕對傾斜,所以香港人係無其他路可以走,唯一嘅出路係「經濟攬炒」,自損利益,「殺敵三百,自損一千」都在所不惜,因為比起錢,香港的年輕人付出得太多。佢講嘅經濟下行、政府講嘅出現財赤、失業率會上升、GDP 下跌等等,對呢堆既得利益者嚟講係噩耗,仲引之為據,指出「黃色經濟圈」嘅負作用,殊不知如此種種正正係抗爭者一單又一單的實質「戰果」。用呢個理論嚟說服香港人,根本係落錯藥。而「黃色經濟圈」嘅理念就係要喺經濟仆直嘅時候,同路人仍然可以生存的保護網。

廣告

文中最嘔心嘅論點莫過於搬出《香港人權法案條例》、《經濟、社會及文化權利國際公約》講「黃色經濟圈」嘅排他性有違人人平等,同違反歧視。呢半年嚟,違反《香港人權法案條例》,違反「人人平等」原則嘅事仲唔夠多:香港人失去咗和平集會嘅自由,失去咗去免於恐懼嘅自由,失去咗隨心所欲嘅言論自由,失去咗傳媒廣播嘅自由:連講一句「你個良心跌咗」都會被拘捕,係自己屋苑都會有破暴入侵,前線記者會被射盲眼連邊個係兇手都無權知道……仲有好多好多,每一單都歷歷在目。呢啲事呢半年嚟日日都發生緊,試問黎蝸藤有無搬出過《香港人權法案條例》去為香港人發聲?宜家仲有面企喺道德高地,用人權自由歧視去指責「黃色經濟圈」違反基本人權?

「黃色經濟圈」遠遠不及「紅色經濟圈」

更加無恥嘅係「黃色經濟圈」根本唔係新事物,亦唔係黃絲所創,只係師承範圍更廣更無遠弗屆嘅「紅色經濟圈」。大家仲記唔記得國泰空姐同機師?因為一句「香港人加油」被炒,因為 facebook 參加過反送中示威被辭,連解釋嘅機會都無;藝人更加要做「護旗手」先有工作,漸漸連「不表態」嘅自由都無,杜汶澤、何韻詩、葉德嫻,早早就被人排咗喺「紅色經濟圈」之外,有無人為佢哋講句「實在是人權的倒退,令人遺憾」。中共政治思想審查嘅魔爪,已經無遠弗屆,伸到國際,NBA 事件、 South Park 事件,最近阿仙奴球員對新彊問題表態事件,台灣 KOL「波特王」被封殺、微博帳戶被改密碼事件,有哪一件唔係政治歧視?有哪一件唔係黎蝸藤口中所講嘅「人權倒退」?

站在道德高地恃強凌弱

現時嘅大企業一直受惠於政策傾斜,一直係既得利益者,自己受惠嘅時侯就唔講「不公義」,當香港人團結起嚟要對抗霸權嘅時候就講係不正義之舉:咁多年嚟地鐵壟斷香港鐵路業務,車站上蓋獨擁龐大地產項目及利益;領展變賣屋邨商場,引入大集團侵入屋邨,趕絕小店老店生存空間;黎蝸藤有無為公義彰顯發聲?如今弱者團結起來對抗強權暴政,他卻站在強權一方指責弱者「不公義」,恃強凌弱之餘仲要立在道德高地,偽善得令人髮指。不過本人甚為支持「為新界地區供電的中華電力根據藍色經濟圈原則,不向蘋果日報供電」,不過記住,香港有 200 萬 +1 人出嚟遊行,有 176 萬投給「黃絲」候選人,記得截哂所有「黃絲」用戶嘅電,一戶都唔好漏,大家可以拭目以待,睇下嗰陣可以點樣「止暴制亂」。

最後,「少數人不負責任地鼓吹黃色經濟圈,實在不值得推崇。」呢句有邏輯繆誤。如果係「少數人鼓吹」,就唔會成功做到「黃色經濟圈」,亦都唔會引嚟一浪又一浪嘅攻擊,就係因為有好大部份嘅香港人意志堅定去支持呢個概念並化為行動,先會帶嚟威脅。你睇 CCTVB 廣告商嘅反應同年尾要裁員削減開支就知。不過,同路人更加要反省「黃色經濟圈」潛在的問題同自我反省,睇下沈旭暉篇〈黃色經濟圈的十字路口,也是運動的十字路口(上)〉會更有得著。

發表意見