立場新聞 Stand News

口講理性,實質無情—回應夜貓TheOwl《不要讓別人利用仇中情緒》

2020/4/19 — 12:33

【文:羅子維】

昨日(18日)左翼專頁夜貓 TheOwl 發表咗一篇文章,名為《不要讓別人利用仇中情緒》,內文旨在表達:「世衛瀨共其實係忍辱負重,如果唔瀨呢,中國就唔畀世衛入中國收集病毒數據,到時全球爆得仲勁。香港人俾人利用仇中情緒盲目攻擊世衛,香港人應該理性云云。」

我希望在此對該文作三點回應:

廣告

第一,無視世衛投共嘅政治現實。

夜貓認為世衛投共其實逼不得意,為咗病毒樣本、數據一定要忍辱負重。咁嘅評論只係美化世衛投共行徑。先不論譚德塞出身提格雷人民解放陣線(呢個組織被列入恐怖組織名單及有極左親共傾向),更唔提早喺二零一六年,中國已經大力支持譚德塞上位。我單單回應夜貓表示:「為咗攞中國病毒資料,向中國示好,世衛一定要拒絕台灣嘅加入、幫助。」呢一點。

廣告

早喺上年十二月尾,台灣已經發信提醒世衛要小心武漢肺炎爆發,結果呢?世衛去到一月尾仍然話唔需要封中國關、唔需要撤中國僑民。而家係世衛主動拒絕台灣嘅協助,幫中國大外宣、隱瞞疫情。喺疫情根本未爆發,世衛根本未夠醒目行動之時,台灣已經想幫手啦,結果係世衛主動無視台灣好意,到中國大爆發出事之際先至有所行動。

如果係為咗去中國攞料先忍辱負重瀨共,咁點解喺疫情爆發之前,世衛已經要拒絕台灣嘅幫助?

佢提到「世衛必須向中國示好」、「世衛要抗疫就要對中國友好」,咩叫對「中國友好」?「對中國友好」係唔係指,喺疫情爆發之際仲叫全球唔好封中國關、係唔係當中國隱瞞疫情搞到全球流行,仲大讚中國處理疫情得當。

夜貓仲話「無興趣猜度世衝嘅原意係瀨共定忍辱負重。」講咗咁多先話無興趣,原來嗰位筆者都係「猜度」世衛原意,斷估世衛為咗地球先瀨共啦?如果可以,煩請提出更多證據,證明世衛係為咗入中國搜集病毒資料,先至早喺十二月就無視台灣。

第二,請勿轉移視線。

該文章仲提到:「真正反應慢的不是世衛而是美國。」「特朗普停止撥款,是將世衛當作政治表現道具,代價是窮國人民的死亡。」

美國急於解封限聚令,確實有錯,但咁樣代表特朗普對世衛嘅批評有誤咩?「特朗普先經濟後健康的做法…是 crime against humanity。」借用夜貓嘅講法,世衛咪係「先中共後全球」?即使我當世衛真係咁偉大臥薪嘗膽,中國肺炎大爆發,世衛仲話唔應該封中國關、唔應該限制旅遊同貿易。唔通咁又唔係「經濟先於健康」,咁又唔係 crime against humanity?

美國如此,就係反人類罪,世衛如此就係臥薪嘗膽。雙重標準也不過如此。

第三,假裝理性,實質無情。

夜貓文中有一句,我特別印象深刻—「美國停止撥款…這不是讓大家用來發洩的新聞,請認清這一點。」

想請教一下,點解讚揚特朗普敢於懲罰瀨共嘅世衛,就係發洩;點解忍氣吞聲,容許世衛繼續瀨共就叫理性?

我哋憤怒、有情緒要發洩,係因為中國隱瞞疫情,誤報、漏報令唔少香港人患病甚至死去,令醫護暴露喺危險當中,而呢個時候世衛仲要瀨共瀨到雪雪聲。全球死亡人數超過十四萬,夜貓仲可以話:「我哋要理性,唔應該盲目仇中,俾人利用。」

藍絲都好鍾意話後生仔俾人利用,但係佢哋永遠都唔會明白,究竟當朋友、手足受傷、身死,係會有幾咁憤怒,又幾咁痛苦。呢篇文章嘅作者,點會明香港人點解咁嬲。

 

發表意見