立場新聞 Stand News

「只有天下人負我」的林奠管治思維

2020/2/22 — 17:30

《蘋果日報》獨家獲得二月中林奠向北京遞交嘅抗疫報告,內容充份表露林奠諉過於人嘅本性,將抗疫失敗嘅責任推哂俾市民、醫護、反對派,甚至係建制派同行會成員。彷彿呢個世界係無 root cause,全世界一出世就憎佢,一出世就與佢為敵,四面楚歌,林奠同佢嘅政府並無半點責任。

呢種諉過於人嘅做法由上而下貫徹整個三司十三局:張建宗失言指「疫情已經受到控制」,只係因為講得太快、太精簡,係你哋理解能力低;陳帆話駿洋邨要做隔離營係因為暉明苑被破壞,要怪就怪粉嶺班暴徒;邱騰華話全球口罩搜購有困難係因為各國施行出口管制,又係唔關香港政府事,即使全世界都撲到口罩返嚟都唔係政府無能。

對反對派狠,對「自己人」更狠

廣告

唔好以為林奠呢種搵敵人卸責嘅手法淨係對外人、反對派,其實對所謂嘅「自己人」更加毫不手軟。當日喺禮賓府向班建制議員落淚痛哭,今日就向北京打小報告,「以選舉理由加入批評政府行列」,對佢人身攻擊,所以施政困難、民望低企;仲要向中央獻計令立法會選舉翻盤,直情係「以德報怨」,不忘舊惡,幾咁偉大。

上年反送中運動,行政會議曾經提出總辭問責,林奠內部話「未輪到你哋負責任」,今日就同中央講「行會成員表現強差人意」,政府民望低就係因為呢堆「廢柴」做最高顧問內閣,又唔諗下邊個委任佢哋做行會成員。

廣告

同樣嘅邏輯下,區議會大敗係歸因於中聯辦統籌協調不力,所以王志民先要揹鑊下台?抗疫重重障礙係因為港澳辦舊勢力喺香港盤根錯節,所以張曉明先要燉冬菇?總之千錯萬錯都唔係林奠嘅錯。

就算對住中央都係一樣,今次「請求」中央喺口罩問題同湖北滯留港人問題提供協助,其實就係暗示口罩短缺係因為大陸唔向香港供貨;接唔到滯留湖北港人返嚟都係因為大陸唔容許。又係唔關林奠佢事,就算個孕婦病死湖北一屍兩命都好,佢咩責任都無。

繼續尋找下一個敵人揹鑊

順住同一個思維,林奠會繼續搵敵人為佢嘅無能失職卸責:如果香港醫療系統崩潰,就係因為醫護偏激所致;今次報告外洩,就譴責公務員團隊無做好「政治中立」嘅角色; 政策推行不暢就係司局長不力; 疫情一旦大爆發就係因為某啲員佐級警員違反衞生署指引聚餐……總之千錯萬錯,都唔係我林奠錯,今日和顏悅色咁講咩「同心抗疫」,他日就為我揹鑊。宜家仲諗住擁護林奠政權嘅高官、警察、公務員、專家,你哋幾時先覺醒終有一日會成為下一個 condom?

只有天下人負我

林奠比曹操嘅「寧可我負天下人,不可天下人負我」更加進一層,曹操至少有 insight 承認佢有「負」天下人,只係佢唔 care;但係林奠嘅病態係「我完全無錯,我領導嘅政府係完美無瑕」,「只有天下人都負我」所以先有今日嘅局面,係徹頭徹尾嘅迫害妄想症精神患者嘅心態。可以斷言,林奠由去年到宜家,由反送中到今日武漢肺炎,政府同佢個人民望屢創新低,佢真心覺得自己一啲錯都無,更遑論反省。既然無錯,又何來辭職之說?

最後,想問梁卓偉一句,當日坐喺林奠隔籬開記者會,信誓旦旦咁講「抗疫只能夠靠科學,任何其他考慮,尤其係政治,一定要摒棄」。到今日,林奠向中央嘅報告指「控制疫情」係操控「選舉政治」嘅手段,敢問梁卓偉到今日仲係咪企喺林奠個邊?係咪仲甘心作暴政嘅政治打手?係咪繼續助紂為虐?又會否秉持科學辭任專家小組?

發表意見