立場新聞 Stand News

「同心抗疫」四個字難聽過粗口

2020/2/10 — 16:47

「同心抗疫 Together Fighting Disease」係港共政權喺武漢肺炎威脅之下嘅宣傳口號,每次自林奠以下,個個官員都苦口婆心咁宣傳要大家「同心抗疫」,但係事與願違,政府推出嘅所有政策,都係「事倍功半」,所有抗疫政策落唔到地: 

對於全港市民嘅全面不合作,林奠政權除咗繼續恐嚇、出聲明讉責、搵警謊鎮壓,好似無乜法子,因為佢哋從來無反省過自己喺呢過去八個月嚟點樣背棄香港人: 

喺理大攻防戰、喺元旦銅鑼灣圍捕入面,有大量急救員、醫護被捕,當中除咗有現職嘅醫管局醫護外,仲有好多醫學生,嗰陣唔同你講「人道主義」,宜家呢班五六年級醫學生自然唔會同你去做義工,超過 97% 嘅受訪醫學生指唔會應邀,主要原因係唔想為呢個政權防疫不力背書。

廣告

宜家仲上訴緊「禁蒙面法」違憲,只有 “pre-existing medical conditions”「原有嘅醫學理由」先可以成為合法嘅抗辯理由合法戴口罩;今日公開呼籲大眾如果知道邊到有口罩買記得通知佢。CSI 個幾千萬個口罩去向成疑,被質疑唔係北上獻媚就係俾哂前線警謊戴住嚟打人、俾屯門公園班大媽賣藝,你話香港人仲會唔會仲同林奠講邊到買到口罩?

「止暴制亂」嘅時候就講「除咗三萬警察,我乜都無」;到武漢肺炎襲港,就呼籲香港人要「齊心抗疫」。個三萬個「忠誠勇毅」嘅蒙面武裝分子呢?十億 OT 就出足,宜家連「海底撈」都無得食啦,點解唔去守隔離營,要勞煩啲無錢收嘅退休「童子軍」? 

廣告

嗰日張建宗回應記者提問點睇公務員對政府嘅招募冷淡嘅時候,仲喺度講「Together We Stand, Divided We Fall」,其實你哋班高官知唔知香港有幾多市民係幾咁想睇住你哋 fall,而不惜任何代價?

當有超過八成市民 Stand together 要求成立獨立調查委員會調查警暴嗰陣,有無回應過?
當有超過八成市民 Stand together 要求全面封關,禁止非香港居民經由中國大陸來港擴散疫情嗰陣你哋有無回應過?
有二百萬人上街 Stand together ,齊心要求「五大訴求,缺一不可」嘅時候,林奠用鄙視嘅聲線講「任何脅迫政府嘅圖謀都唔會得逞」到宜家喺好多香港人心目中都仲係「音容宛在」,宜家叫番同一班香港人「齊心抗疫」?真係當全面香港人失憶?

當天,林奠治下嘅港共政權有幾狠心咁背棄香港人民;今日就十倍奉還,喺各方面與政府不合作。從來都視民意為草芥,目空一切嘅林奠,今日要呼籲全港市民「同心抗疫」,簡直難聽過粗口。香港人喺呢一疫最大嘅覺悟就係在於「政府應該懼怕人民,而不是人民應懼怕政府」。政府只係人民嘅一個「代理人」,而唔係「主子」,當全民站起來,社會上每一個齒輪拒絕運作,政府都要跪低。

發表意見