立場新聞 Stand News

同美國最年輕參議員 Josh Hawley 見面

2019/10/14 — 13:08

圖片來源:作者 FB

圖片來源:作者 FB

感謝參議員Josh Hawley喺美國國會小休期間訪港,繼佢琴日去到旺角親自視察之後,今日見面嗰陣都傾左好多香港抗爭所面對嘅狀況。無論係新屋嶺虐待同性侵犯、警察無差別攻擊市民甚至拘捕記者,去到《緊急法》通過後香港面臨嘅人道危機,呢啲都係佢相當關注嘅問題。

會面期間我都提到,其實如果唔係中美貿易談判同埋台灣總統大選呢兩個關鍵因素,到底習近平九月嗰陣會唔會死死地氣接受撤回《逃犯條例》,大家都心裏有數;而家暴雪封殺電競選手同埋NBA嘅寒蟬效應越加明顯,香港人更應該把握呢啲槓桿,繼續推動國際向北京施壓,守好抵抗北京威權擴張最前沿嘅陣線。

就著香港人爭取民主,佢當然非常支持,正如佢本身已經Co-sponsor左《#香港人權民主法案》,我都主動問到佢點睇未來參議院嘅情況,因為法案最快會美國時間星期二徬晚喺眾議院大會審議,但參議院目前只將呢條排法案排喺議程第238項。希望喺佢返到華盛頓之後,可以推動參議院多數同少數黨領袖將香港法案列於更前嘅位置,眾志駐華盛頓同埋美國東岸嘅代表都會繼續跟進。

廣告

至於各位網民最關心嘅問題,都應該係佢今晚會唔會出席「香港人權民主法案集氣大會」,不過佢都好可惜咁話俾我聽自己未能出席,夜晚都已經要搭飛機趕返美國(順帶一提其實TedCruz都已經離開咗香港),準備國會聽日小休完要復會。不過喺日程咁匆忙嘅情況下,都來回搭三十幾個鐘飛機過嚟香港視察,都真係相當之唔話得。

作為美國最年輕只得39歲嘅參議員,日後都會同佢保持聯繫,尤其我諗我同佢都會見證到2047年嘅香港會變成點,累積同埋壯大香港民主派喺華盛頓嘅友好網絡,絕對係細水長流嘅關鍵工作。

廣告

作者 Facebook

發表意見