立場新聞 Stand News

同路人唔係敵人,認清楚敵人係邊個,仲有好長既路行

2020/8/20 — 17:12

立場新聞資料圖片

立場新聞資料圖片

【文:Ken Fok】

大部分泛民指佢地想守住「議會戰線」,認為自己三分之一既「關鍵少數」不可隨便捨棄,任由政改,DQ 現任議員等「惡法」通過,還「有險可守」,守住議會係議員既責任,總辭只係不負責任既行為。

反對既聲音指泛民以往什麼都守唔到,「國歌法」,「國安法」等「惡法」依然通過,「議會戰線」根本不存在。加上接受委任有如認同非法立會,國際有機會認為港人妥協。要守住依家既小圈子選舉同滿目瘡痍既行政法治,不如總辭加速攪炒,這種舉動甚至有機會令中共大失預算,反置中共兩難局面 — 要順佢地意加速「攬炒」,定係按兵不動?

廣告

兩個截然不同既意見,衍生左好多陰謀論。

有人認為泛民唔捨得一年既高薪厚職,正如港獨之父梁振英先生所講「人地仲要供樓架!」。

廣告

有人認為支持總辭既人係想趁機奪權。

有人認為泛民入臨立會等同被中共招安,等於出賣港人。

有人認為支持總辭既人係鬼,令中共趁虛而入。

不論係咩陰謀論,最後得出既結果係:「反對我既人就係敵人。」

但係佢地所講既「鬼」,「供樓人士」,「奪權人士」正正係被真正敵人迫害既人,係一年間不論做左幾多都好,都有參與抗爭既人 。即係「同路人」。

「同路人」未必理念相同,未必係衛道之士,未必係正人君子;如「和理非」同「勇武」互不認同,泛民,本土派,抗爭派理念不同,甚至互看不順眼。

但係我地最終既目標一樣,我地先走埋一齊;我地既敵人得一個,我地先集埋一齊對抗佢。

所謂「不分化不割蓆」,「核爆都唔割」,就係即使我地互看不順眼,隊友好豬好白痴,隊友做錯事都唔割,因為相信團結就是力量(天我竟然要講依啲野,毛管戙),雞蛋不斷撞高牆高牆終會倒下,滴水終會穿石,即使幾唔妥佢幾唔鐘意佢,做錯既改過就要原諒佢地,唔鐘意既都要支持佢地。

結果遇到臨立會依種將來極有可能會再遇既問題,就有割蓆危機。

將反對自己既同路人扣上「人血饅頭」既帽子,再打倒佢。

而真正食緊人血饅頭,每個月攞緊廿萬三十萬,控制大部分香港事務同公帑既高官同建制派就食住花生睇我地同路人鬥同路人。

有啲人甚至玩文字偽術,話「唔係分化,不過支持總辭既就唔係同路人」或者係「唔係分化,不過入臨立會既就唔係同路人」,割蓆仲要玩文字偽術,自我感覺良好,見到果陣真係唔知講咩好。唔講仲以為佢地講緊湯渣,羅致光之輩。

今次臨立會有新敵人,下次都會有新敵人,只不過敵人可能係昔日戰友。

今次臨立會風波有公投無公投,定係有總辭無總辭,總會有人不高興,結果難以預測。希望結果係點都好,用咩手段都好,點樣說服都好,都唔好視同路人為敵人,真正既敵人係唔會對我地咁客氣。

希望依一次既「危」會轉為「機」(雖然衷心希望,但講依啲野真係會令人毛管戙),令到香港人更加團結,等待黎明來到。
黎明來到後再鬥都未遲啊,係未?

發表意見