立場新聞 Stand News

「同路人」就不能有言論自由?

2020/8/21 — 18:34

資料圖片,來源:Joseph Chan @ Unsplash

資料圖片,來源:Joseph Chan @ Unsplash

有時真係睇唔過眼。

去定留立會,大家都講出自己嘅理據,而這是一個擺在現實的 dilemma,進退兩難。但大部分人都記得,我們都是同路人,退還是留都有一個共同目標和敵人。

但見到有 KOL 呼籲,邊個政治人物或 KOL 支持留任或含糊其詞,就用經濟封鎖佢,唔好再課金畀佢哋,包括任何訂閱。

廣告

有錢就是任性,有權就會腐化。

我本以為,錢,是用來支持言論自由的,所以我們不斷買、訂閱《蘋果》,又落廣告甚至買股票,因為我們支持維護言論自由、真相的媒體。

廣告

然後只係一個星期多啲,啲錢轉咗用嚟反言論自由。一班成日話「唔好捉鬼」嘅勢力,話留任「係妥協係投共係鬼」,聲言要用經濟壓力去封鎖佢哋嘅意見,咁其實同中資大財團唔喺《蘋果》落廣告並恫嚇其他人唔准落廣告,分別喺邊?

如果呢樣係啱嘅,咁係咪同時要呼籲,唔好再訂閱或支持「反對留任、支持封殺支持留任嘅 KOL」?

我就做唔出。

啱呀,香港係一個資本主義社會(乜仲係咩?唔係攬炒咗已經唔係咩?),推動黃色經濟圈真係好可笑啊,人哋幫襯藍店關你咩事?而黃色經濟圈再變成黃中黃經濟圈,仲好笑。

咁大家一向都知,《蘋果日報》同老泛民就好 friend 嘅,咁如果肥佬黎支持留任,咁係咪以後唔買《蘋果》、取消訂閱、放哂啲股票同埋以後唔為《蘋果》寫專欄(如有)?

還聲言「支持真正嘅同路人」,真係同當年老董提出「新香港人」有異曲同工之妙。所謂「同路人」,可以忘記初心,忘記當初「同路」係為咗咩,再不斷重新定義為「真」、「真真」、「真真真」,呢啲笑話喺極權歷史上真係屢見不鮮。

OK,咁你哋自己真同路人同啲假同路人係咪從此割蓆?

本人唔怕經濟封鎖,因為本人從未收過訂閱捐獻,我真係可以大膽暢所欲言。咁其他同路人呢?佢哋因為被政權打壓,或參與運動冇咗份工,或一直課金、捐款、支援畀好多抗爭路上嘅後生仔,依家只係因為一個有爭議嘅議題發表自己嘅睇法,要被你呼籲經濟大封鎖?

口口聲聲話唔好當手足係 condom,咁係咪背後支援的和理非就可以係 condom?

 

(標題為編輯所擬)

作者 Facebook

發表意見