立場新聞 Stand News

向每個加入工會 投下公投一票嘅香港人致敬

2020/6/21 — 14:42

作者提供

作者提供

昨日(20日)嘅公投結果 - 8943 人投票

對於結果,我並無失望,反而我地知道更多嘅香港人選擇企出黎,參與落去工會戰線之中。

自運動開始之後,唔同行業嘅手足都希望可以響不同嘅範疇為運動出力,從而建立起唔同嘅新工會,希望響職場上組織同路人,甚至以發動大三罷作為手段去壓迫政權。不論你係學生定係工會,響呢一個大時代之中,每個人都有自己嘅責任去履行屬於自己嘅責任。昨日有 30 個工會選擇走出黎,連結學生,對抗來自中共以及港共嘅壓力,以合法嘅形式,去向政權表達自己嘅不滿。

廣告

作者提供

作者提供

廣告

自罷工罷課公投行動發表以黎,港共政權以及黑警不停打壓工會以及學生運動,林鄭帶頭譴責公投,及後到楊潤雄、聶德權、張建宗等人相繼出招,而政權最擅長將所有威脅自己嘅事情妖魔化,令到合法嘅事情都變成非法。

宣佈國安法立法後,大公司等等紛紛投誠以示忠實,原因都係因為利益相授。而作為一個香港人會最清楚明白,利益並唔會比自由以及公義更重要,所以面對極權,只有一個選擇 - 反抗。

工會嘅責任,除咗處理勞資相關嘅問題之外,更重要嘅係響呢一個時代之中同行。而我地亦知道,今日嘅公投運動,香港人已經踏出重大嘅一步,冒住被清算嘅風險,甚至已經有手足被清算,都選擇繼續企出黎,目的就係同政權講「我地唔會妥協」。

由運動一開始只有幾十人嘅新工會發展到今日,我地知道今日並唔係我地完結嘅一日,未來嘅日子,我亦希望能與香港人同行,而我,一路走來始終如一,會與所有香港人齊上齊落,直到最後一刻。

作者 Facebook

發表意見