立場新聞 Stand News

和理非區選之後可以做啲乜?

2019/12/11 — 21:57

資料圖片,來源:Chromatograph @ Unsplash

資料圖片,來源:Chromatograph @ Unsplash

1) 一齊關注自己整個區議會嘅社交媒體(其實又不外乎 FB〜)。 如果你好彩係非建制當選,請多為你自己有份送入議會嘅區議員獻言,例如提示本區問題,積極發表意見,適時鼓勵,甚至 share 佢地嘅 post,幫佢地增加曝光率,都有助佢地施政,同埋為後續做準備。

2) 唔好大細超,順便關注埋建制派當選者。做得好,你不妨可以 like 下;否則在 FB 内提出尖銳嘅民生問題,揭露建制派議員/政府工作嘅弊病,但要寫得有技巧,唔好比人覺得你係來踩場 — 亦係輿論戰嘅一部份。

3) 關注下自己物業嘅業主立案法團或者係業主委員會嘅工作。首先自己物業自己睇,管理費等項目都係自己錢,加上樓宇保養維修等,係建制經濟圈嘅重點之一,在公在私睇緊啲天公地義。第二,法團同管理公司係樓宇嘅把關者,要堵截建制派「入屋」拉票或做選舉工程,要靠大家參與法團工作把關。第三,法團有機會整體就地區事務發表意見,係市民監察區議會以及民政署工作嘅另外一扇窗口。第四,香港唔少屋苑在地鐵上蓋,住宅及商業物業管理都由港鐵控制。雖說地鐵管理得宜,但為免其偏袒建制派,自己關注及參與有助減少物業公司一些有意無意嘅傾斜。

廣告

4) 法團委員如果給人公正持平嘅形象,將來要發揮變身成爲非建制嘅樁脚,或者係為幫手助選,甚至單係為非建制候選人提供意見,都係好寶貴嘅幫手。

如果大家有其他意見,歡迎提出,大家集思廣益。

廣告

 

作者 Facebook

發表意見