立場新聞 Stand News

唔要一萬 唔撥款畀警察 我們有得揀嗎?

2020/2/28 — 11:05

八個月前,抗爭者冒住一切一切風險,親手重奪理應屬於人民嘅立法會,發表「七一金鐘宣言」,呢一幕你仲記得嘛?

七一前,好多人仲講緊「四大訴求」、或者第五個訴求係「林鄭下台」。真正將「特首立會全面雙普選」寫入五大訴求嘅,成為香港人共識嘅,係七一呢個晚上。抗爭者會不顧一切,都要打入立法會,塗黑議事廳嘅「區徽」,就係想提醒香港人,呢個敗壞嘅議會已經失效,已經唔再為香港人服務,我地要用更進取嘅抗爭手段,賭上一切,去光復議會、光復香港。「我地香港人真係唔可以再輸架啦!」你記得嗎?

好多人話寧願唔要一萬,換來黑警唔獲增撥資源,講到好似真係有得我地揀咁。係不公義嘅選舉制度下,縱使所謂民主派每次得票都過半,但議席卻從未過半,根本就唔夠票去拉倒呢個財政預算案,遑論要提出修訂,係分組點票制度下獲通過。

廣告

二零二零年啦,仲未明個問題係個制度到?係我地改革到成個制度之前,講咩「唔要一萬,唔加人工」,我地根本冇籌碼冇能力去做呢個交易,只能任由建制把持嘅議會強奪香港人嘅民脂民膏。

我唔係想否定好努力係體制內盡力爭取空間嘅朋友嘅努力,但我更希望大家唔好忘記七一義士衝入立法會嘅初衷,唔好忘記金鐘宣言嘅五大訴求,唔好忘記我地真正嘅最終目標,唔係反對警察加人工,亦唔係搶佔功能組別議席,係改革制度 —

廣告

光復香港。
時代革命。

作者 Facebook

發表意見