朝雲

朝雲

左膠

2020/5/2 - 15:33

唔該攬炒成功後每人派三萬 溫和者的小小建言

圖片來源:臺中市政府警察局「TCPB 局長室」

圖片來源:臺中市政府警察局「TCPB 局長室」

請容在下老實說:追求理想的前提是承認現實,唯有面對現實,才有希望改變現實。

而家經濟好差,好多人失業,好多人水深火熱,自己就係其中之一。要說服普羅大眾為左政治理想放低生計攬炒(財政預算案十九有舒困措施和派錢方案),真係好難好難。

所以理想派不宜輕蔑溫和派的顧忌,現時民氣對 35+ 相當不利 — 尤其係理想派想告訴選民,原來攞 35+ 係想否決財政預算案,迫政府再一次選舉。好多民主派支持者真係唔明,明左亦好難接受。

廣告

對家打正名號以「反攬炒」作反動員,可見對家評估過當此時勢打穩定牌有勝算,加上「中間路線」瓜分紅利,民主派注定陷於劣勢,勝算極微。

但追求民主唔可以當選民係工具,要對選民真誠。無論佢地明唔明白,支唔支持,都有責任向佢地解釋清楚:我地已經無左份工,等緊政府救我,點解喺咁艱難嘅時候仲要去搏,去搏一個睇嚟虛無飄渺嘅希望。

民主派只能夠盡心竭誠回應人民。若果「攬炒」成為共識,請在選前準備一份屬於民主派的財政預算案,厚厚的一本,一定要比政府更厚更詳盡。

我們有責任說服人民,若香港真的有民主,當民主派真的執政,財政預算案點樣急人民所急。唔可以因為艱難而玩假,要認真。若果推動者心底其實覺得無望,人民更加唔會對你有期望。

有心人要清楚話畀人民聽,光復後嘅香港會係點嘅樣。重光後嘅香港會好似台灣咁優勝,唔同出身嘅人(唐鳳、林旭佐、賴品妤)都可以獨當一面從政;唔會面對疫症落得一罩難求;唔會縱容藥房囤積居奇;唔會任由人民自生自滅;唔會縱容警察橫行無忌。

至於派錢,為彌補疫情損失,每人派三萬蚊理所當然走唔甩。選舉時要向每個選民派出那本厚厚的預算案,同選民講政府派得雞碎咁多,攬炒成功後我地每人派三萬,而且確認信上面會標註「三萬 Thx」。

仲有政府啲宣傳好垃圾,香港重光後所有部門都要好似台灣咁日日出梗圖。

* * *

配圖來源:臺中市政府警察局「TCPB 局長室」(cutt.ly/5ydeoGc

選圖前有過顧慮,擔心冒犯女士,誠心道歉,但必須坦誠自己睇到就忍唔住笑。

正因為台灣的民主政府給予下級極大自由度,才會出現各部門鬥玩梗圖的風潮。

現懇請所有看不懂梗位的男讀者 share 此圖,以示你們純潔清白。順便呼籲親朋仲趕得切登記選民,今日就係最後一日。

下面就係網上登記機!!!

https://bevoter.today

作者facebook