問責 ... 對唔住

喺街踩到人鞋踭，「對唔住」。

地鐡唔小心撞親人，「對唔住」。

心急入?，兜口兜面撞到人，「對唔住」。

叫羅漢齋伊麵，嚟咗乾炒牛河，伙記知道衰咗，「對唔住」。

老公去滾，老婆知道咗，老公知錯，求老婆原諒，「對唔住」。

只要真心誠意，「受害人」同意，一句「對唔住」或者攪得掂。

但係 ...

鉛水事件咁大件事，無檢討過時制度，無跟進國際水質標準，無監督施工驗收覆查，呢頭叫人慳水，嗰頭叫人開水兩分鐘至好用水驗水，攪到人心惶惶，唔知飲乜落肚，生活大受影響，嘥咗好多好多好多錢，居然係集體領導制度嘅錯，無人需要負責喎，一句「對唔住囉」，萬二分七情上面道歉嗰隻，就全部一筆勾銷，唔使受害人同意，大佬呀，有無攪錯咗。

唔講刑事民事責任，唔講浪費金錢時間，唔講惶惶不可終日，都要講講問責啩，問責嘅嘢，一字咁淺，道德承擔失責是也，堅決唔肯道德承擔，可能只有一個原因吧。

條氣唔順，就乜都係假。

原刊於作者facebook專頁