立場新聞 Stand News

國安法背後的底線思維,香港人可如何自處?

2020/5/25 — 13:34

5.24 市民響應網上號召,再次走上街頭抗議「港版國安法」。(立場新聞圖片)

5.24 市民響應網上號召,再次走上街頭抗議「港版國安法」。(立場新聞圖片)

中共宜家喺武漢肺炎疫情受到全球各國圍攻嘅時候突推「港版國安法」,目的係釜底抽薪,轉移視線,用香港問題做人質,用中美喺香港嘅共同利益作要脅。睇下美國究竟肯付出幾多,敢唔敢全面撤銷香港獨立關稅區地位,以至全面封殺中國公司到港集資嘅渠道。呢一場對中共嚟講係一場大賭局,如果賭贏咗,美國因為美資在港嘅利益而不敢全面「斬纜」,任由「國安法」喺香港落實,之後香港就正式由中共全面接管。

若果歐美等西方世界嘅回應只係流於口頭上嘅譴責、關注而無實質嘅相應有效而迅速嘅制裁行動,中共就會試到歐美喺武漢肺炎疫情之下嘅底線。喺咁嘅情況之下,中共既可全面掌控香港,又可以繼續作為獨有嘅「離岸」人民幣債務中心、外匯洗錢窗口,喺「國安法」嘅陰霾之下,在港嘅美資反而會成為人質,隨時可以重演港版嘅華為孟晚舟戲碼,以勾結外國勢力之名拘捕美籍商人,反守為攻,作為同美國談判嘅政治籌碼。

時機上面,宜家五月尾,去年反送中嘅一連串「週年祭」迫在眉捷,六四晚會以限聚令禁止,但係隨住疫情降溫,限聚令唔能夠無限期延長,避得過六四,避唔過 6.12、6.16、7.1、7.21、8.31 等一連串嘅紀念日子。所以要趕喺呢段時間立「國安法」,並將「恐怖主義」納入「國安法」嘅範疇入面。隨住推動「國安法」觸怒群眾,預期嚟緊六七月香港將會迎嚟另一波嘅大型社會動蕩,5.24 銅鑼灣已經打開第一場前哨戰,到時港共、警察、中央、黨媒等就會配合大量假新聞,大肆宣揚恐怖主義在港紮根,合理化「國安法」「反恐」嘅必要性同合理性,將抗爭者打成「本地恐怖主義組織」,向外堵住外國悠悠之口,向內則藉此遊說安好穩定嘅中產在港人士,「黑暴」先係破壞香港嘅源頭。最近黨媒嘅風聲刻意將香港嘅抗爭同 ISIS 嘅恐襲、911 自殺式襲擊拉埋一齊,煽動歐美群眾對恐怖主義嘅深痛惡絕,使歐美輿論與香港抗爭運動切割。

廣告

預計「國安法」喺八月左右由人大常委會通過正式成為法律,時機上一定會喺九月立法會換屆選舉前正式立法。中聯辦喺去年區議會失利,大敗於破紀錄七成投票率,今次繞過立法會直接立「國安法」,就係想矮化香港立法會,同時淡化立法會選舉,捉住香港人「立法會已經無用」、「35+ 都唔會有任何影響」嘅心態,煽動分化、白票黨再度活躍,壓低番 5-10% 投票率,再配合「國安法」新準則 DQ 候選人,務求扳回呢場民意戰。

人大一講話推「港版國安法」,即日香港移民查詢大增,預計移民潮會湧現。幾年落嚟,就會走咗一大班有能力走嘅中層,亦都係中共樂見。呢班好多仲係港英年代嘅知識分子、專業人士、公務員,喺香港唔同領域入面佔據住重要嘅位置,而佢哋仲係堅守緊程序公義同法治精神,對於中共嚟講,呢班人嘅存在唔係助力,反而係阻止佢哋全面掌控香港嘅絆腳石。所以高調以雷厲風行式立「國安法」,趕走呢班麻煩嘅人,剩低嘅中層自然就係覺得錢比價值重要,願意為中共辦事嘅「能吏」。配合不斷輸入大灣區嘅人才,便可高速進行香港人「洗牌」工程,幾年落嚟,掌握住香港嘅命脈嘅就會係嚟自內地嘅「新精英」。

廣告

「國安法」落實之初,必定營造「馬照跑、舞照跳」嘅歌舞昇平之象,樓、股繼續炒,暫時唔會向平民動刀,以證明中共同林鄭宜家條 line:「國安法只係針對極少數嘅人,絕大部份嘅香港人嘅自由人權都唔會受到影響」係啱嘅。但係黎智英、黃之鋒、張崑陽等勾結外國勢力等人一定會被重判,以收殺一儆百之效,就算佢哋流亡海外,對港嘅影響力同號召力亦會大減,更坐實佢哋勾結外國勢力嘅罪名。隨住白色恐怖壓喺頭上,言論就會自我審查,大部份港人亦會喺「國安法」嘅陰霾下噤聲,一日內刪 Facebook 嘅潮流就更加印證咗港人會迅速適應 “new normal” 嘅常態。高壓手段換嚟表面上嘅平靜,足以換嚟時間率先「整頓」三個最重要嘅範疇:公務員、傳媒、教育,牢牢掌控意識形態,從聶德權、邱騰華、楊潤雄呢三員「猛將」近期嘅表現便可得知。

所以中共嘅思維係要用「港版國安法」嘅盡快扳回國際線上嘅劣勢,既唔會扼殺香港呢隻會生金蛋嘅鵝,同時全面掌控香港嘅意識形態,作為香港人先要理解中共嘅「底線思維」先可以相應作出反抗:

  1. 風險同不確定性永遠係金融中心同資金嘅敵人,人民對「國安法」不斷反抗而帶嚟嘅動蕩不安,將會成為外資落戶香港嘅最大隱憂,所以香港人要保持抗爭意志,堅決地對扼殺港人自由人權嘅「國安法」說不。
  2. 國際線方面,要從外資嘅利益角度入手,著重論述香港若成為另一個內地城市,全面受中共掌控,長遠嚟講對歐美而言「只有弊,沒有利」。港版孟晚舟事件將會上演,美國在港資金有機會被凍結,富商肖建華事件未來可以喺陽光下進行;再講任由中共藉由香港集資,只會讓中共繼續座大威脅世界嘅最大邪惡政權。
  3. 最後就係立法會戰線,雖然立法會嘅職能已被削弱,但係九月立法會選舉好可能將會係香港有意義嘅「公投」,更加唔應該輕易以「白票」、「廢票」放棄,要將立法會選舉嘅論述由 35+ 嘅目標上升到香港人對「國安法」說不嘅層面,係一場唔能夠輸嘅民意戰,否則票數上輸咗俾保皇建制派將會被扭曲成為「廣泛民意歡迎就國家安全立法」嘅解讀。

咁難捱嘅一年都過去了,到了真正「打大佬」嘅危急存亡之秋,香港人還會退嗎?

發表意見