立場新聞 Stand News

國難忠醫有難,點解仲要換來咁嘅批評?

2020/1/11 — 23:37

被帶走「國難忠醫」成員母親(右)

被帶走「國難忠醫」成員母親(右)

見到有人罵國難忠醫 admin「林鄭都係咁」(下稱「肥仔」)自己送頭送中,書生真係嬲到震。

國難忠醫係今場運動幫過救過咁多人,無私付出;今日有難,卻換來一啲手足批評「蠢」、「累街坊」,究竟你地係唔係真係當大家係手足,半年有多,明唔明咩係團結。

肥仔本身需要係內地實習,依個係讀中醫必須的,根本無得揀。有人話搞得運動就唔應該再上去,「最多唔讀」、「defer」,咁係唔係要人放棄哂成個人生,先代表有資格參與運動?忠醫為忠醫,正正係因為讀過醫,所以先識醫人。叫人放棄讀醫,即係放棄自己專業,咁仲點更好地救人?如果唔想再有手足被迫要返上去讀書實習,不如諗下點改革制度仲好,例如中醫學生點解無機會係香港做實習,大家又有無諗過?

廣告

國難忠醫都已經表示被幫者嘅個人資料都有另外 file 處理,咁已經說明忠醫並唔係無考慮到被捕風險。瞭解到被捕風險,仲願意咁投入參與,甚至一個星期特突返嚟香港幾日,為嘅就係手足嘅健康,仲想要求忠醫啲咩?

依幾排警察開始起訴 TG admin,已經有 admin 還押排審可能排一年,等同坐監一年,大家究竟知唔知做 channel admin 有幾辛苦,忙到仆街,責任重大又無收益、法律風險又高,對運動無真正嘅熱誠根本做唔嚟。已經陸續有 admin 表示太攰或被人罵到退出關頻,如果話近排街頭運動有退潮跡象,而家我地係唔係要連 TG 都開始要退潮?定正正因為運動開始靜落嚟,大家又開始重蹈覆轍互相嘲諷批評?

廣告

TG admin 當然要做好安全措施,但被捕可以有好多原因。警察國家機器本來就好難對抗,被捕唔代表安全措施做唔足,而係國家機器太強大,手足係不幸被捕,而唔係「蠢」被捕。即使再退一步真係做唔足,咁咪「不完美可改善」,大家係唔係唔記得咗依句嘢?

救人要緊。唔可以比國難忠醫被消失!

 

(標題為編輯所擬)

作者 Facebook

發表意見