立場新聞 Stand News

堅持下去,並不是我們真的足夠堅強,而是我們別無選擇

2020/5/21 — 23:43

資料圖片,來源:Carlo Yuen @ Pixabay

資料圖片,來源:Carlo Yuen @ Pixabay

係。我知今晚大家都驚、亦會擔心;我呢刻都會諗,到底國安法通過之後,香港會變成點?又有幾多人會被告?會取締幾多組織?拉人封艇去到咩程度?會唔會送中?被捕或入獄,自己都尚算有過幾次經驗;但後者會瘋狂到乜嘢程度,甚至幾個月後自己會喺邊,其實未必向身邊嘅人交待到。

我諗都無謂強作樂觀,睇完今晚人大個記招,大家都心知肚明,今鋪「港版國安法」,根本就係為國際戰線手足度身訂造。北京務求中斷我地累積到最能夠著力嘅國際線往績同工作,眾志必定係打擊對象。

今日資訊量多到唔識點俾反應,又或者都唔太知下一步點樣行落去。呢種情緒,於網絡世界感受到。下午起連登網友叫我著草嘅 post,我都睇到。喺 Telegram group 亦有好多網友 tag 我,朋友定記者都有問過我,但對我來講,答案都好簡單:「唔走」。

廣告

其實比起好多手足嘅付出,自己所承擔嘅風險實在微不足道。比起受傷、受困或漂零海外,自己挨區區百日刑期又算得係啲乜?

暴風雨前嘅寧靜,總係令人大家感到更鬱悶同埋吃不消。無錯,中共擺明係想消滅國際戰線,將我地一網打盡。但身邊嘅人點勸都好,我都覺得,我有責任去堅守呢個崗位,為延續國際線繼續創造應有嘅可能性,實在無放棄嘅理由。我從無後悔推動《香港人權民主法案》,即使有一日呢個要成為我地嘅罪名,消滅我哋嘅藉口,眾志都會以投入國際戰線為榮。

廣告

灰,人之常情。我到依家都未消化到,但我仲想同大家一齊頂落去。我好想繼續同大家作戰到底,呢場仗打咗一年都未夠,我絕對唔會讓退場成為我同眾志既一個選項。民主運動來到現在嘅關口,就係考驗我地意志嘅時刻。

儘管拉人封艇,取締眾志不再是空談,留一口氣,點一盞燈,拜託大家幫忙延續國際戰線血脈

存亡號召,絕不撤退。

 

作者 Facebook

發表意見