立場新聞 Stand News

外人點可能去破壞祖墳呢(補充版)

2019/7/24 — 18:53

何君堯

何君堯

我睇咗何君堯回應記者關於祖墳被破壞嘅事,就覺得好奇怪:

1. 我昨天話,睇吓地圖,村外人好難入去。後來很多人指正,幅圖的位置錯了,正確位置在另一方,唔使經過村屋。咁我撤回「要經過村屋」的部分,但其他部分一樣合理,不用撤回。

2. 首先,外人要搵到路入去,仍然係好難。再加上,網上傳的祖墳位置,根本是錯的,其他人如我者,根本無法熟知圍村的地形情況,更加強了這個觀點:外人連確實位置都唔知,請問點會輕易入到去?除非 Google Map 或其他地圖有標明邊個位置係何君堯父母的墓地,但我諗冇囉。

廣告

3. 好了,呢兩日風頭火勢,元朗變死城,唔係自己人邊個敢入去做嘢?就算係唔經村屋,都要經過好多地方,而呢幾日全個元朗屯門都如驚弓之鳥,外人入去做嘢,點會唔驚動地方勢力?不過其實呢個問題已經唔使深究,因為如第 2 點講咗,外人應該會去錯地方,只有熟知何君堯和該區地形嘅人,先咁有本事輕易搵到個墓穴。

4. 喂,仲要拎工具㗎喎,你估依家個個 Captain Yuen Long,赤手空拳打爛個碑呀?兩三個拎工具嘅後生仔咁嘅時勢敢入去做嘢?唔驚畀人斬死呀?如果係成隊人入去做,唔好搞笑啦,畀人影哂啦。

廣告

5. 條路咁長,又多山路,唔只一個人去做,至少都兩三個,仲要拎工具,咁樣行入去,啲狗(我講真嘅山狗唔係巡邏嗰啲)都吠到仆街啦,唔通真係可以神不知鬼不覺走咁遠路入去做嘢?

6. 咁即係話,最有可能係熟人做嘅,佢熟路,熟地形,甚至熟村民,先可以咁容易去到。

7. 何君堯呢,一向係好叻仔嘅,佢能夠喺鱷魚潭上到呢個位,其實我從來都唔睇小佢,但另一邊睇,佢咁樣上位,中間得罪咗幾多人影響咗幾多人嘅利益?肯定唔少囉。

8. 咁即係話,呢次事件,可能真係今次元朗恐襲嘅紛爭,又或者係何以前嘅牙齒印,睇落真係好難關其他人事。當然還有一點,就係有人自導自演,喺鏡頭面前用苦肉計博同情。有啲人咁叻仔權力慾又咁大,不擇手段係絕對可以嘅。

簡單講,有人想借刀。昨天已有 post,影咗佢個墳相同講咗位置,所以有人將計就計,借刀殺人,嫁禍畀人囉!

再者,搞人山墳係一種很大嘅禁忌,尤其喺中國傳統更加係極大嘅禁忌,夠膽做嘅,一定係窮凶極惡嘅人。

那些黑衣示威者,善良到咩地步,善良到畀人打十三拳唔還手,善良到喺商場幫助無辜市民避暴警,善良到會留低好多散銀畀人搭車走,善良到畀暴警濫權打咁多次都幾乎冇乜還過手,善良到可以用老弱嘅身軀去保護後生仔,善良到會唱幾小時聖詩去抗爭……你覺得,呢啲人會有咁大嘅膽,去犯中國人認為傷天害理嘅禁忌,去破壞人祖墳嗎?我已經唔講佢哋會唔會咁無腦咁做,剩係講那份膽量,我真係唔相信呢班抗爭者會有人有呢個膽,喺呢個時候闖入白衣恐襲暴徒嘅地頭做如此犯禁嘅嘢。

邊啲人夠膽做?如果你有睇《詭探前傳》,就係陶大宇飾演那種黑社會大佬和其手下才夠膽做,那些連平民百姓、女人、帶着小孩的師奶、老人家、手無寸鐵嘅年輕人都可以重手狂鞭狂打嘅人,就一定夠膽做!

 

作者 Facebook

發表意見