立場新聞 Stand News

「大躍進」思維,戴尿片做全民檢測,注定係個計時炸彈

2020/9/12 — 23:29

圖片來源:港台影片截圖

圖片來源:港台影片截圖

香港醫療一直最重視嘅,唔係業績,而係質量。

做醫療,人命攸關,容不下大意嘅錯失、唔合標準嘅做法,但始乎「中国醫療」唔係咁運作。

中国檢測隊用一種「大躍進」式嘅心態去做佢地口中嘅醫療,一嚟就誇下海口話要每日做三十萬個檢測,一如大躍進時期嘅「人有多大膽、地有多大產」式做法。結果開始檢測頭幾日,已經穿煲,發現頭幾日,每日可以做到嘅檢測量只有五萬至十五萬不等,大量樣本囤積,採集完要苦等多時都要完成驗測。

廣告

就係因為政府好大喜功,盲目推廣要「全民檢測」、為「健康碼」鋪路,結果推出咗一個咁完全失敗、不能達標嘅計劃。

到發現計劃失敗:檢測能力不足、參與人數不足、搵到嘅患者遠不如預期。呢班失敗嘅「中国檢測隊」同政府,仲可以走出嚟自誇,「哇!我戴住尿片都繼續做呀!」。明明係當初錯估形勢,以至做唔到原訂目標,竟然仲可以攞出嚟讚自己。

廣告

我睇到嘅,唔係咩佢地好勤力香港人要謝主隆恩,而係一個潛在嘅計時炸彈。

呢一班獲政府豁免在港註冊就免檢疫來港工作嘅中国「醫療人員」,本身嘅資歷已經引起好多香港人疑慮。而家仲要話佢地不停超時工作,同汗同尿一齊工作?「火眼實驗室」咁惡劣嘅工作環境,去處理過百萬香港人嘅醫療樣本?佢地辛苦到咁,如果出錯,撈亂或者污染病人樣本、洩漏樣本做成污染、錯誤棄置醫療廢物,都絕對係人之常情喎。到出錯嘅時候,呢班豁免香港註冊嘅人員,喺「火眼實驗室」入面閂埋門,香港人又會唔會被蒙在鼓內?

一個醫療實驗室,根本就唔應該有尿片同汗濕全身。仲攞出嚟好似開「誇誇群」咁讚自己,呢啲好大喜功當醫療程序係生意額咁追嘅態度,終有一日害死香港人。

當呢班「中国檢測隊」表現完全唔達標嘅時候,一個理性嘅政府最應該就係叫停計劃,唔好再錯落去,偏偏政府再一次表演倒行逆施,不停為求追數,將計劃延長又延長。

「火眼實驗室」呢個隨時出錯、隨時出事故嘅計時炸彈,就喺香港中心。祝大家好運。

作者製圖

作者製圖

 

#大佬呀唔好咁黐線啦

作者 Facebook

發表意見