立場新聞 Stand News

奪立法會控制權 定港版反滲透法

2020/3/27 — 13:24

【文:財奴】

九月嘅立法會選舉,可以講係去年社運及區議會選舉嘅延續,重要性可能比前兩者更甚。近日各黨派、各行各業嘅民主支持者已經展開選舉嘅前期工程。佢哋組織工會、為唔同嘅個人及團體登記成為功能組別嘅選民,希望喺呢個嚴重傾斜於建制嘅選舉制度中,搶灘成功,奪取超過35個立法會議席。

過去幾屆選舉,中共政權透過中聯辦協調建制派嘅候選人影響選情,已經去到明目張膽嘅程度。其實,基本法第二十二條有如此嘅規定:

廣告

「中央人民政府所屬各部門、各省、自治區、直轄市均不得干預香港特別行政區根據本法自行管理的事務……」

我有一個願望,就係民主派藉住區議會選舉嘅氣勢,唔單止喺立法會總體取得過半數議席,連喺功能組別嘅35席中都取得過半數,從而可以喺分組點票中取得話語權,為基本法第二十二條進行本地立法,將中央政府干預特區事務嘅行為,列為嚴重嘅刑事罪行。

廣告

其實為基本法第二十二條立法,喺上屆特首選舉中,胡國興法官都有提出過,但當時並未引起廣泛討論。時宜勢易,經過反送中運動後,香港人已經完完全全同中央政府決裂,基本法係中共用嚟控制香港嘅工具,聰明嘅香港人應該用呢個工具入面嘅條文反咬中共一口。

立法嘅內容其實亦唔需要太過複雜。年初台灣通過咗嘅反滲透法甚有參考價值,只要將該法12條條文中嘅「境外敵對勢力」,改為基本法第二十二條入面講嘅「中央人民政府所屬各部門、各省、自治區、直轄市」及佢哋嘅屬下機構,再略作修改就可以。

香港人爭取真普選多年,但就算爭取成功,都要確保選舉不受中共干預,因此為基本法第二十二條立法係必需。雖然民主派要取得立法會嘅絕對控制權難度極大,但即使唔成功,都值得提出為第二十二條立法。立法嘅目的係要捍衛基本法,建制派即使要反對,都要睇睇佢哋攞出乜嘢原因,去反對一條為確保基本法得以執行嘅法例。為第二十三條立法前,先為第二十二條立法,可以確保一國兩制中嘅中港區間得以維持,令香港嘅優勢可以持續。

發表意見