立場新聞 Stand News

如何清算警暴?先清後算

2020/1/5 — 11:37

文:攬炒藝術家】

清算警暴,港人心願。縱容包庇,無日無之。老豆搵仔,由是興起,意欲震攝鷹犬。有人謂過火,有人謂太溫和。常言道:打狗看主人,有一句更真切,做狗看主人。

點解仍不斷有警暴?有評論話佢地太怕清算,所以不停有警民衝突,唔停就唔會有清算,把他們看太高了。還原基本步,他們不過是打工仔心態,所以唔會有良心責備而辭職,老細要跑數,就求其拉幾件,做錯嘢有老細包庇,就更加放膽猖狂。市民高喊清算警暴,他們只當唱歌。要諗諗,點先令佢地驚?打工仔最驚乜?飯碗不保。幾時先驚?一係公司唔掂,一係老細換人。老豆搵仔最多只當地盤工業意外,唔好彩啫。

廣告

唓,中共換走林鄭咪一樣。所以要由我地換,而唔係由中共換。鬼唔知阿媽係女人?但特首選戰仲難打過立法會。錯!錯!錯!這是傳統智慧,但今日形勢不同。小圈子選舉有一條陰濕規則,就是大部分界別要早一年行動才有資格登記做選民,例如一年前入乜乜協會。一年前大家做緊乜?排隊飲喜茶!所以立法會的黃金時間已過,雖然仍不可放棄。但是今日民意海嘯導致區選大勝,特首選委的區議會界別117席此消彼長,收窄了234席差距,條數就好唔同!

簡言之,由於有一年「時差」,宜家特首選戰仲容易過立法會,關鍵係只剩兩三個月黃金時間救亡,唔好畀中共靜靜雞贏。唔信?下面畀數據你睇,分析咩界別可以攻,係可以過600票架。退而求其次,如果全民動員玩小圈子的聲勢浩大,令到中共鐵票唔夠601票,老細之位不知鹿死誰手,班popo 打工仔都唔敢亂咁選邊站啦。遠水不能救近火?兩三個月後中共透過監察幾個關鍵商會的會員數目、工會及社團增加數目等等,就大概知道是否夠票,如果鐵票不足,就要在讓步、輸掉特首、或攬炒式大搬龍門之間作抉擇。到時要警惕和諧論,用放過黑警來換取釋放義士。警暴不懲,何以安身立命?何況執法者犯法罪加一等,懲治他們是我們香港社會本來的權利,所謂交換條件,等同要我地用自己錢買返自己既嘢,五大訴求,缺一不可,最初或許是叫價,如今已變成底價。所謂取捨交換,不過是中共用人地嘢當自己籌碼的慣技陷阱,要不是中共想用送中條例強拆基本法的法治防火牆,義士何需犧牲?

廣告

咁我地要做乜?要跳出舒適圈,一人攞一張團體票。講個秘密你知,小圈子選舉攞團體票仲易過個人票!只要針對合適界別,填表格、template、交些證明文件就可以,但要早12個月行動,即係宜家!攞完團體票仲可以保留本身的個人票,但不可同界別。

講多個秘密:團體大定細都係只得一票,每人不可代表多過一個團體,所以鬥團體多變相可以係鬥人多!每人可創辦多個團體,可以授權相關手足而非創辦者代表團體投票。

下圖是懶人包攻略,將全人類分做四大類:打工仔、老闆、師奶/退休、未夠秤,針對各類背景精選最易實行的,動員成功就可得93席,只要民主派攞埋剩返未全取的專業人士界別 (個人票為主,上屆只有中醫界少於半數席位),加埋就剛好601票,仲未計宗教界玩抽籤的選委席位。

圖一:特首選委界別懶人包攻略,詳情看原文〈終極懶人包,全民湧進小圈子攻略,剩返唔夠三個月!〉

工會章程 template
FB page: 和你開工會
TG: 立法會功能組別攻略、組工會TG總公海
FB page: 文化同行 ARTicipants
TG:[光復功能組別] 體育、演藝、文化及出版界要人!

剛好601票你嫌不夠穩陣?係架,想知仲有乜界別幫到手,睇埋下圖數據,精選發掘了十二個建制界別,全部都係有能力合資格既人遠多於當選所需得票,至少係十倍以上,即係容易翻盤,問題係冇乜人知道點樣加入,同埋冇乜人知要早12個月行動,詳情看原文〈換特首只需四萬素人新血,三個月截止!〉。嫌太長,也可看https://hkvote.net按所需資訊click入。

圖二:有可能被新血攻陷的建制票倉界別

先清後算

先「清」楚大勢,後「算」謀行動。配合國際大勢,多條戰線進擊。若有任何疑似選舉搬龍門,即與國際緊密溝通聯絡,加大壓力。若怕DQ之類而放棄,與認同中共大晒論無異,若中共真能完全無視所有規範,香港已有幾場六四而非小型六四矣。除了把握國際時機,亦可與黃色經濟圈戰線配合,多發掘黃店並呼籲登記為該界別選民,除了食店,不要忘了零售店,這是中小企第二大類別,批發與零售界已登記選民只佔少數,美容、髮型屋老闆也歸為零售界。

先「清」除包庇源頭,後「算」賬犯罪爪牙,咁就要「清」晒可以攻既特首選委界別,到時老細由我揀。立法會有人工,特首選委沒有,我們素人要更加落力著緊特首選委戰線,不要依賴政客。

只要贏了特首選戰,要跟黑警算賬就簡單了。把少數白警、篤灰警升職,確立相關保護證人、污點證人措施,先篤者得平安,先到先得。2022年也剛好是鄧炳強退休之年,萬一中共阻撓特首提名新的警務處處長甚至其他高官,新特首可以運用提名權變相攬炒懸空高官之位,由港府委任的各局副手實質掌權。當然,仲要先保存證據,大家手足做緊嘅繼續做,將來一定有用!

(作者自我簡介:不怕攬炒但不急於攬炒的香港人)

發表意見