立場新聞 Stand News

如果你打算投白票/唔投票

2019/11/24 — 12:35

區選當前有好多論述都叫大家唔好俾泛民食人血饅頭;抗爭者流血,泛民就袋票;理大學生無人理,做咗 condom;宜家投票即係 endorse 港共政權,贏輸都令佢哋有咗合法執政云云,鼓勵人投白票或者唔投票。但係有幾點要反思:

1. 今次嘅區選被視為「公投」,係全港市民對六月以來逃犯條例修訂到抗警暴一連串運動嘅表態,其實質意義已遠遠超越區議會議席,如果失去過半民意支持非建制派,好容易會被林奠政權解讀為「主流民意並不支持條例抗爭」;

2. 失去咗主流民意論述,外國勢力很難再找到切入點去關切甚至插手香港狀況;

廣告

3. 今次係首次 453 個選區都無直接當選,係單議席單票制之下係最直接嘅民主,比起立法會選舉嘅民主性更強,如果「五大訴求」核心中嘅核心係爭取「真.雙普選」嘅話,點解區選都係一人一票嘅選舉我哋會放棄?

4. 「投票就等同 endorse 港共政權」嘅論述真係成立,咁就唔應該再抱擁、爭取五大訴求入面嘅真雙普選,因為呢個都係體制以內,一國兩制基本法下的憲制要求,而現時無可否認地「港獨」並非現今社會最大共識;

廣告

5. 如果真係要完全同現有體制決裂而否定所有選舉,所以唔可以投票,但係 action plan 呢?單純唔投票或者投廢票並不能推翻或者令到區選消失,選舉仍然會如期舉行,客觀效果只會令建制得利從而騎劫民意。不投票、杯葛選舉之後如何令區選不能正常運作嘅 action plan 先係最重要嘅一環,但係從來見唔到呢方面嘅論述;

6. 除咗傳統泛民,今次仲有好多學生、新生代、甚至係前線手足加入區選戰圈,單純投票俾非建制就 = 益咗泛民嘅論述係過於簡單,同時抹殺咗好多新生代嘅加入;

7. 即使係傳統泛民,亦有好多係呢次運動入面係受到廣泛民意支持,甚至勇武,好似幾個月間升上神枱嘅「鄺神」、許智峯等都多次出現喺衝突前線;

8. 參選並唔係無代價的,除咗要公開自己嘅資料,同準備選戰外,仲有好多血的教訓:大家仲記得岑子杰嗎?係旺角被鐵錘襲擊,仲有鄺俊宇,仲有個俾人咬甩耳仔,永久傷殘,血債佢哋都有份。放自己個名喺選舉名冊,企街站,在現今嘅香港係有風險,會引嚟血光之災的,並不是坐喺到食人血饅頭;

9. 泛民個底好花,但係建制呢?當初係邊個帶住潘曉穎家人出嚟開記者會話要彰顯公義,繼而力推逃犯條例?民建聯。又係邊個帶住成班建制出嚟開記者會話要立禁蒙面法協助警方止暴制亂?都係民建聯。邊個喺立法會度為周梓樂同學默哀都走咗出去?仍然係民建聯、工聯會。又係邊個上綱上線話前線手足係暴徒,全力支持警察用暴力止暴制亂?邊個反對成立獨立調查委員會查警暴?香港人係咪善忘到呢個地步?唔投票、投白票嘅結果係令到呢班人可以繼續風風光光大搖大擺咁係話自己得到廣泛民意支持,我哋對唔對得住死咗嘅手足?

10. 我哋無權利去投走林奠政府,無票去投走鄧炳強,投走鄭若驊、李家超,我哋唯一手上嘅票,擁有法定權力嘅一票去投走建制嘅一部份,如果咁都放棄,咁我哋一直爭取緊啲乜嘢?

兄弟爬山,各自努力。一直係成個運動嘅教條,呢次係和理非嘅回合。抗爭路上,寸土必爭。如果我哋聽從 689 嘅挑撥離間,只會令親者痛,仇者快。

 

#區選唔係Endgame
#只係其中一關
#贏咗唔會打爆機
#輸咗會GameOver

(標題為編輯所擬)

發表意見