立場新聞 Stand News

如果國家需要一個 condom 去安撫被制裁嗰班人…

2020/6/27 — 20:42

圖片來源:陳曼琪 Facebook

圖片來源:陳曼琪 Facebook

面對全球圍堵,美國制裁,雖然我都知國家驚都未驚過,但我 feel 到香港啲權貴商人都好驚,因為今次自治法案涉及範圍極廣,而且講明「禍必及家人」,又學習了中國特色,冇寫明具體細節,即係話鍾意搵邊個落鑊就搵邊個,如果歐盟響應,咁權貴仔女就真係準備回國或去北韓升學吧。而三萬警察啲家屬都腳震震,首先佢哋又唔肯聽從散仔協會呼籲畀仔女去大灣區升學,仲心思思想仔女出國讀書,咁出得去邊?跟美國香港都友好嘅日韓如果都加入制裁黑警,日韓台聯手,咁成家人以後剩係去新加坡泰國同返祖國旅行,我認為係一件好事,但唔知點解佢哋一定好唔開心。

咁如果國家想安撫呢班人,最後一個可以體面反擊嘅策略,就係宣布陳曼琪為美國潛伏香港多年嘅間諜,全球追緝。陳曼琪何許人?就是她向兩會提案,包括書面建議北京,訂立國家安全法並將之納入附件三,不需經立法會審議,直接在香港實施。學葉國謙話齋,明眼人都知香港好多間諜,而明眼人都看得出陳是其中一個,中共可以宣布,經過多日查證,發現此女目的乃方便美國甚至全球制裁中共,是打着紅旗反紅旗。中共為了捉拿這個女間諜,花了很長時間搜證,終於放長線釣大魚,勾出其代表美國的目的,你看,圖中陳曼琪完成任務後的笑容何等燦爛,想必是想起為美國立功、陷國家於危難時喜上眉梢。

有人會反駁,如果中共咁做,以後仲邊有人肯做佢哋嘅 condom?放心啦,香港奴才還缺嗎?我保證一啲影響都冇,只要主人一聲令下,搶住做 condom 嘅還是大有人在。沒有陳曼琪,還有吳秋北,吳看到陳的下場,定必奮身以報,更加賣力。而中共親自為全港權貴和警察解下這個炸彈,他們也會感恩圖報。

廣告

只需一招,香港人開心;中共不用被圍堵兼挫美國銳氣,又開心;權貴得脫,又開心,更將加倍報效國家;其下奴才你做咩佢都係開心,且將更為賣力……實為 win-win-win-win situation,真係考慮得過喎。

 

廣告

(標題為編輯所擬)

作者 Facebook

發表意見