Pazu 薯伯伯

Pazu 薯伯伯

旅遊寫作人,為最早一批在網上連載遊記的香港人,多年來足迹遍佈歐、亞多國,在喜馬拉雅山麓、東南亞、南亞等地區生活。著有《風轉西藏》、《北韓迷宮》、《西藏西人西事》及《不正常旅行研究所》,分別在香港、北京及首爾出版。作者 Facebook:https://www.fb.com/pazukong;網誌:https://pazu.com/blog;Pazu 兒歌網:https://www.pazu.com;相集:https://www.instagram.com/pazu;Patreon 頻道:https://www.patreon.com/pazu

2020/1/31 - 14:05

如果我的醫護朋友話要罷工

政府為咗支援警察暴打市民,出錢買 full gear,買水炮車、買裝甲車、買聲波炮,幾億幾億咁丟落鹹水海,連 OT 都可以出到十億港幣,絕無手軟。

但係政府為前線醫護買口罩,卻只係 ASTM 嘅 Level 1 而已?(第一級是低防護,第二級是中防護,而第三級則是高防護。)世衛出咗指引,講到明對抗 WARS 要用 ASTM Level 2 或以上嘅口罩。香港政府大把錢,支援差佬打壓市民,就幾億幾億咁出,但買口罩畀前線醫護,就用住低級別嘅 Level 1 先?

當有醫護質疑口罩效用,政府嘅應對,居然就只係搵醫管局個主任出嚟話,生產商聲稱(嗰啲包裝上寫明 Level 1 低防護嘅口罩)都有 Level 2 嘅中防護效果喎。咁包裝上話無,你話有,你叫醫護信邊個?政府係咪有責任請個獨立嘅實驗室,去做啲測試,等醫護放心啲?

廣告

而家病房接收啲乜嘢病人?隱瞞又有,逃跑又有,明明去過湖北,唔出聲。明明自己有可能感染,唔出聲。啲自私病人唔想自己受隔離,寧願到處播毒,播毒畀醫護,播毒畀醫院員工,播毒畀同房嘅其他病人,最後再播毒畀全香港市民,政府唔理。

醫護一早叫政府封關,禁止非本地人從疫區入關,政府唔理,連叫旅客填張申報表都要不情不願才實行。

醫護一早投訴防疫裝備不足,政府唔理,叫醫管局口頭上強調裝備足夠就算數。

醫護一早叫市民要戴口罩,政府唔理,反而違背常識教導人民如何唔戴口罩,大發謬論話一般社交場合唔需要戴口罩。

醫護一早預料疫情爆發後會不堪負荷,政府唔理,重要大開免費之門!

政府逼到醫護揚言要罷工,政府依然乜都唔做,就只係識得發動打手,企圖搶佔道德高地,攻擊醫護,詛咒醫護,批鬥醫護?疫情嚴峻,但政治病毒更為肆虐,十七年前嘅衛生災難教訓,完全無汲取,十七年後以為用文革式手段就能解決?疫情未止息,就開始發動文革式攻擊,咁疫情過後,係咪要大清算?

港府對抗疫情,忽視醫學專業,事事政治行先。醫護發動罷工,正係要逼使政府聽取專業意見,亦係抗疫嘅關鍵。

如果我身邊有醫護嘅朋友話要罷工,我希望大家會同我一樣,同佢哋講聲:支持你哋嘅決定,加油!

 

作者 Facebook