立場新聞 Stand News

守得住下一代,就贏得到未來

2021/2/4 — 22:58

學民思潮 facebook 圖片

學民思潮 facebook 圖片

「撤回洗腦教育!還我獨立思考!」
「我們年輕,我們瘋狂,我們相信,所以我們勇敢。」
「政府的卑鄙我們看到了,但我們絕不可允許他的通行。」

洗腦國教,一如所料地重臨,今日重讀左八年前呢篇絕食宣言。

「絕食」手段或者顯得過時,但永不過時嘅,係對信念嘅堅持。



殘酷嘅真相係,你知我知,洗腦國教係必然會實行,任憑我地再百萬人上街、再絕食幾多日,港共政府亦斷然寸步不讓。

但我們絕不允許他的暴虐,成功毒害我地嘅下一代、香港人嘅未來。擋唔到國教,我地更加必要係每一個課堂以外嘅範疇,守護學子嘅思想。

洗腦國教最新嘅綱領無孔不入,遍佈地理、生物、常識科等都要扯上「國安元素」,呢個正正就係我地要借鏡嘅戰略,從生活每一個範疇,接觸下一代、去啟發佢地嘅思考、建立香港人嘅身份認同。

今日係兒科病房先見到有小朋友睇緊中国卡通片,諗返,有機會嘅話,都應該問下佢做乜睇啲咁醜樣嘅,幫佢轉台介紹佢睇返啲唔係Made in China嘅。遲啲過年,如果仲有機會見到親戚啲小朋友、後生仔女,不如大家都關心了解下佢地接觸緊啲咩?有時網絡回音壁得太緊要,你唔會發現身邊嘅小朋友,可能睇緊中国綜藝、聽緊中国歌手、睇緊TVB嘅原來。佢地係呢個城巿嘅未來,了解多啲佢地做緊咩,唔好嘅,幫佢地改左佢呀。

再進一步嘅,大個少少嘅,試下同佢地講多少少香港發生過嘅事啦。嗱,犯法嘅煽動唔好做啫,至少香港地而家仲容得下講歷史事實真相,就盡呢個空間去傳承。

我都會同我中學師弟妹講,當年2012年、2014年,學校同學點樣係校內討論、參與學生運動,當年老師點樣同我地一齊係罷課集會中討論咩叫「公民抗命」,比佢地知道,香港本應係一個自由、免於白色恐懼嘅地方。

過多兩年嘅HKU新生,都未必知道港大紅磚牆上曾經掛過嘅橫額、曾經噴過嘅字、薄扶林道曾經有過嘅防線,呢一切都等我地傳承,路過行過,有機會咪講下。中大、理大,一切地方都有佢嘅香港故事。

記住,要同對家一樣無孔不入。

中文科,可以講廣東話嘅優勢。經濟,分析下雷鼎鳴啲「佔中蝕一萬億」有幾荒謬。化學,講下咩係三聚氰胺。生物,講武肺同沙士嘅故事、三聚。歷史,二戰香港保衛戰嘅故事。宗教,香港嘅宗教自由對比中国嘅嚴密監控。

我地尊敬嘅教授,講起肝癌,都會輕輕帶過一句,有一個諾貝爾和平獎得主,係死於肝癌,佢叫劉曉波。



我都好開心好多朋友用自己嘅一技之長,教補習、教課外活動、音樂、體育、辯論,去接觸更多嘅小朋友,學生,去了解、引領佢地嘅成長。

即使擋不住洗腦国教,但我地仍然可以與之抗衡。

香港人,自己未來自己救,香港下一代真正需要嘅教育,由我地親手做起。



學民嘅朋友,希望唔好介意我偷返八年前嘅Post回帶 :)

連結

 

廣告

作者 facebook

廣告

發表意見