立場新聞 Stand News

官商私相授受,口罩「銅芯」搵食,一國一制全面接軌

2020/5/8 — 17:18

「銅芯抗疫口罩」嘅醜聞越揭越多,由一開始死都唔肯公開獲得合約嘅公司,被傳媒揭發由晶苑國際無經過公開招標程序承接成單高達八億嘅生意,疑中間涉及利益輸送。公佈嗰日林奠戴住 CU Mask 見記者,連同新任創科局局長薛永恒出嚟賣花讚花香,高調讚揚口罩獲得專利同 2018 年獲日內瓦國際發明展金牌,仲煞有戒事咁將個獎放出嚟喺記者會到展示。今日再有新發展,再被揭發獲得金獎嘅口罩係利用「弱磁場」原理,唔係用「銅芯」嘅原理,魚目混珠,意圖誤導市民,誇大銅芯口罩嘅效用。

林奠自己戴住個「銅芯抗疫口罩」出嚟見傳媒自吹自擂嘅時候,其實知唔知獲得日內瓦發明金獎嘅唔係「銅芯」口罩?

若果係知情嘅話,係咪代表以佢為首,公開向全香港市民講大話,違反「商品說明條例」?如果係唔知情嘅話,究竟係邊個欺下瞞上,俾咁大隻蕉皮俾林奠跣一鑊金,涉嫌干犯「公職人員行為失當」罪?

廣告

大家仲記唔記得,喺二月疫情最嚴峻嘅時候,全港市民全球搜羅口罩,喺嚴寒下通宵排隊幾公里買幾百蚊一盒口罩,甚至改裝防毒面罩 filter 自救。嗰陣林奠出嚟講「邊個官員戴咗口罩我都會叫佢除番」,當時政府被揭發採購口罩用公開招標嘅方式,「價低者得」,以致採購失敗。但係去到批八億合約俾晶苑嘅時候,創科局常任秘書長蔡淑嫻就指出「公眾健康及情況緊急下,可以進行直接採購」。咁點解全球買口罩,即買即用就唔屬於「情況緊急」,反而二三月製造,五六月疫情減退口罩先到市民手嘅「銅芯口罩」反而屬於「情況緊急」,可以繞過公開招標嘅程度呢?呢種唔合情理嘅雙重標準,係咪因為直接採購中間無油水可賺,做唔到政治酬庸,要批合約先換取到政治利益?

成個生產銅芯口罩過程,無經過正常公開招標程序,由政府直接主動聯絡 HKRITA 香港紡織及成衣研發中心,經 HKRTIA 穿針引線之下,將高達八億嘅合約批俾晶苑國際。而 HKRITA 嘅董事同時係晶苑國際嘅董事或行政總裁,消息一出,晶苑國際股價急升 15%,收市亦逆市升 12.5%; 仲不特止,三月晶苑國際有多單過千萬股權交易,當中有無涉及內幕交易?一間市值只有 60 億嘅上市公司,因為一單 8 億嘅生意,市值已經單日跳升超過七億,咁都唔係徹頭徹尾呢利益輸送?

廣告

再講,宜家市道低迷,歐美各國需求驟降,cut 訂單無生意要執笠嘅廠商大把,喺咁嘅時勢可以穩袋 8 億營業額,仲係擔保唔會拖數,唔會違約嘅香港政府庫房,咁嘅生意都「唔明白點解外界會認為係利益輸送」?如果作為創科局嘅常任秘書長,手握政府資源,連咁簡單嘅道理都唔知或者扮唔知,又點能夠信賴佢會為香港庫房把關?

蔡淑嫻仲多番強調晶苑國際以「友情價」承接,仲擔心佢可唔可以收得番本錢,但係之後又爆出每個口罩成本價只係 30-40 蚊,製造九百萬個口罩只係兩億,咁當中嗰六億去咗邊?係咪就係晶苑國際袋咗落袋?即係扣除運輸成本、HIRITA 嘅行政費等,盈利亦相當可觀。再者做生意嘅嘢邊有一間上市公司真係會「捱義氣」做蝕本生意?即使最終係蝕本或者平手,喺自由經濟市場之下,又幾時輪到香港政府常任秘書長去擔心人家嘅賺蝕?而晶苑國際嘅廠房設喺越南,如果真係要撐香港企業,保就業,點解唔係將啲公帑益香港嘅廠商,而係去越南設廠?設廠越南嘅目的就係要壓低成本,既然無做過公開招標,價比三家,蔡淑嫻有咩證據知道晶苑國際以接近成本價報價?係咪佢講就信?

相比之下,台灣早喺一二月已經全面投入口罩生產鏈,用咗大概兩億元台幣就可以日產過千萬口罩,成為全世界口罩生產第二大國家。將公帑用喺本地廠商,真正做到「撐企業,保就業」,惠及成條生產鏈由廠房老闆到工廠員工,出產嘅口罩即使以低廉嘅價格賣俾民眾,真正「同心抗疫」,數量仲多可以送去歐美做口罩外交,唔係疫情漸退嘅時候先推出口罩邀功,但係內裏腐敗不堪。

香港人辛辛苦苦搵嘅錢,高樓價下榨出嚟嘅血,儲番嚟嘅庫房儲備,就係咁樣上下其手,官商勾結,作為政治酬庸。喺現今禮崩樂壞嘅香港,再唔可能分開政治問題同民生經濟問題,一切都係高度政治化,無人可以再講「我唔識政治,唔好阻住我賺錢搵食」。宜家連整個口罩出嚟派俾市民嘅民生工程都充斥住大量污糟邋遢嘅黑幕,香港嘅腐敗不單只係制度性,更加係全面性同普遍性。今日係小小一個口罩,他日就會係你用左畢生積蓄買嘅千萬樓盤都會變成豆腐渣工程,實施一國一制,與大陸全面接軌。呢個係法治敗亡,社會契約被撕破的必然結果。

發表意見