立場新聞 Stand News

對南韓封關,係林奠對中共的回禮

2020/2/25 — 11:32

南韓疫情爆發,每日確診人數逾百,多區出現大爆發,成為全世界僅次於中國嘅疫區。林奠政府「果斷」向南韓封關,禁止所有非香港居民從南韓入境,並對南韓發出紅色旅遊警示,一次過滿足醫護罷工多時「全面封關」嘅訴求。突然間,「全面封關」既阻唔到貨運,又唔會將回流港人摒諸門外;更加唔會構成歧視,同埋又變得「有意思」。

一日間,林奠政權打倒昨日的我,示範終極雙重標準,七萬幾確診唔封,八百幾症就衝出嚟封,喺政治掛帥之下將港人嘅身家性命視為草芥。

問題係,點解林奠政權要多此一舉,喺呢個時候向南韓封關?南韓來港嘅旅客比起大陸少好多,唔會對港構成大威脅;加上港人嘅生死從來都唔係林奠 agenda 內,佢念念不忘嘅只係點樣喺九月立法會選舉為建制派翻盤;而且對南韓封關後輿論一致口誅筆伐,就知無助民意逆轉,更加表露佢「政治凌駕科學」嘅做法。

廣告

答案只有一個:就係要幫中共篡改歷史。

中共想洗清「武漢肺炎」源自中國嘅意圖十分明顯,一直都想撇清「禍首」嘅惡名:首先世衞譚德塞多次強調唔可以叫做「武漢肺炎」,要叫 COVID-19,將疫症去中國化;配合大陸輿論散播假消息,指肺炎病毒來源係台灣、美國,唔關中國事。隨住大陸嘅疫情喺內地慢慢「受控」,同時全世界各地包括南韓、日本、意大利、伊朗等地相繼爆發,「武漢肺炎」就唔再係中共獨家。可以肯定係不久嘅將來,大陸疫情會完全「受控」,地界各地就越演越烈,喺中共龐大嘅宣傳機器推動下病毒起源就會被模糊化。

廣告

事實喺大陸永遠都係相對,歷史從來都係由中共撰寫:8964 嘅血腥鎮壓變成「春夏之間嘅一場騷亂」,2003 年沙士可由 6 號(編按:無線藝人陸浩明)把口講個來源係嚟自香港,2020 嘅武漢肺炎同樣可以寫成中國大陸係最大嘅受害者。佢哋唔駛呃到全世界,只要呃到國內沸騰嘅人民,再次高舉民族主義,讓中華民族再次成為苦難下嘅受害者,鞏固佢哋搖搖欲墜嘅政權就可以,而林奠就係呢方面幫咗中共一把。

除咗對南韓封關,同日衞生署將疑似個案嘅準則由「14 日內到過中國大陸並出現上呼吸道感染癥狀或肺炎」改為「14 日內到過中國大陸或南韓人士」。喺定義上將南韓同中國大陸劃成一致,係將疫情去中國化嘅第一步。可以預見,港府會毫不猶豫咁繼續對其他各國封關,相反喺國內疫情慢慢「受控」之下,就會將中國剔出定義,或者放寛大陸人來港,造成既定事實,為大陸洗底。

中共嘅回禮就係林奠秘密報告要求嘅兩樣嘢:容許港府派包機接載滯留湖北港人回港,所以李家超宣佈率先接武漢港人;第二件事就係口罩問題,同日深圳市政府透過中聯辦每日向香港提供十萬個口罩,首批一百萬。可以話有求必應。

暴政最怕真相。要應對中共同港共寫在紙上嘅意圖,我哋要好好訓練好自己嘅記性,向外多方面宣揚真相同事實,「武漢肺炎」永遠都係「武漢肺炎」。

發表意見