立場新聞 Stand News

對選戰的幾句觀察

2020/6/9 — 23:24

運動一週年之際,初選即將起跑。因工作關係,不會公開支持任何一位參選人。謹此寫幾句對選戰的觀察。

對泛民:

好簡單,每位數一數自己為這場運動付出了些什麼。我乜都計:不一定要上前線同警察周旋三百回合,也可以在後面跟囚權幫手足,亦可以是動員街坊搞本土經濟撐黃色經濟圈民間自救。你可以說明你如何用你的身位幫這場運動,你就值一票。但如果過了一整年你還是數不出甚麼似樣的事情的話,你退選啦。

廣告

對本土/自決/素人:

我明,情感上,好多人都想有個新開始,自然會討厭老泛民;我亦明,從選舉操作來講,這個時候一定是夾泛民來在潛在選民身上得分。但現實是過去十年來有幾多人以鬧爆泛民作為選舉工具,當選之後卻對民主運動毫無貢獻?所以,唔好意思,呢幾個月每次我見到任何本土/自決/素人出來鬧爆泛民,我都會不厭其煩問一句:咁你打算點?俾一個具體的做法同承諾我。如果你嫌泛民「唔夠激」,請你講明你打算響會議廳點激法。如果你投訴泛民唔開會,請你保證你到時所有最細的委員會都會百分百出席。我要聽到實質的承諾:如果你打算所有議案(包括起學校醫院)都投反對,請講明。否則,每一次有任何本土/自決/素人出來夾泛民,只會令我反感,更加不想投你一票。冇辦法,早兩屆太多案例,使我覺得不能對新人有太多幻想。

廣告

對選民:

我希望大家明白,雖然我們每人只投一票,但比例代表制下每區都係要選一隊人出來,而不止是一個人。而同一選區內其實甚麼人都有,實是百貨應百客。期望每一個參選人都和你想要的百分百相配合是不切實際,不如想想這些各有優點缺點的參選人之間該如何組合,排條同花順出來,在當下的社會中才是最有戰鬥力。

最後,35+ 其實有幾大可能?仲有冇用?唔知㗎。不過過去一年都係咁㗎啦:做咗先囉。如果因為機會細就唔講,其實條街冇一句口號係嗌得個喎。

 

(標題為編輯所擬)

作者 Facebook

發表意見