立場新聞 Stand News

屬於香港人嘅繪本 —《羊村守衛者》同《羊村十二勇士》

2020/12/23 — 17:18

圖片素材來源:《羊村十二勇士》封面及插圖

圖片素材來源:《羊村十二勇士》封面及插圖

【文:香港言語治療師總工會】

今個學年一開學,就傳出有老師因為一份討論言論自由嘅工作紙而被釘牌嘅消息,其後有線裁員事件、黎智英被捕被關押、教育局強行加入國安法教育、通識科被滅科等等嘅一連串事件,都畀我哋清晰噉見到香港言論自由嘅空間日益收窄,同時可以預見未來小朋友自小喺學校、喺主流媒體入面接觸到嘅資訊,就只剩低政權編改好嘅洗腦教育。

Amin Hassanzadeh Sharif 嘅繪本《藍色大樹》(大塊文化出版;粘耿嘉譯)入面講到,國王因為無辦法接受城入面嘅藍色大樹比自己更受歡迎,鋒芒更勝自己,於是下令手下斬咗大樹。但即使大樹被斬咗,佢嘅樹枝依然停留喺城嘅每家每戶入面,最後生長成一個壯麗嘅森林。

廣告

過去一年,不斷傳出有小朋友被警察無理對待、被判刑面臨監禁嘅消息,本應無憂無慮嘅童年需要被捲入香港呢一段荒謬嘅歷史入面,令人無比內疚同心痛。但無論如何,未來嘅香港係屬於今日嘅小朋友。既然而家政權喺我哋生活各大範疇都畫下紅線,企圖用謊言向小朋友洗腦,所有家長同從事有關兒童工作嘅香港人,更要好好保護我哋每一個屋企入面嘅「藍色大樹」,靠自己將真相傳承落去。

故此,我哋先後製作咗兩本繪本 —《羊村守衛者》以及《羊村十二勇士》,期望令家長有多一個媒介向年幼嘅小朋友講述事件。《羊村守衛者》期望能夠向小朋友解釋反送中運動嘅由來,《羊村十二勇士》則係希望小朋友能夠明白十二港人嘅情況,同時關注佢哋以及其他被逼流亡嘅香港人。

廣告

而家《羊村十二勇士》嘅實體書亦都擺放咗喺唔同嘅黃店度畀大家免費取閱,派發地點可以參考本會網站。

「幸好這世上仍有抹滅不了的東西。」(出自《藍色大樹》一書),就等我哋一齊將呢樣「抹滅不了的東西」一齊宣揚、一齊傳承落去,相信香港總有一日能夠變成一座壯麗嘅森林。同時,祝願十二位勇士、所有被困、被迫流亡嘅香港人早日平安歸來。

發表意見