立場新聞 Stand News

希望當香港光復時,能夠補飲到杯喜酒

2021/2/16 — 9:13

情人節讀到 Lester 嘅訪問,當然會覺得幸福到骨痺(褒義詞),但同時亦覺得成家立室咁理所當然嘅事都被視為新聞時,其實都係反映社會出現:咗好大問題。仲記得雨傘時喺某次示威見到「革命是為了更好的愛情」,好多朋友都喺Facebook上轉發,深感同意。身處亂世,連好地地咁拍拖都成為咗一種奢侈,輕則因為政局而導致無晒心情、情緒受困,重則就因為入獄、流亡而令情侶分隔異地。

但亂世亦令大家更清楚明白陪伴喺身邊嘅人,心底最真實嘅面貌到底係點。無論人類有幾自認係「外貌協會」,伴侶嘅心地、品味、價值觀,其實先係大家諗長遠會唔會投入一段關係嘅指標。當社會出現大是大非嘅動盪時,所有人嘅價值觀都會赤裸地展露人前,分分鐘會令好多人更清楚枕邊人腦海入面諗緊乜。不時都聽到有人呻「社運令人分手」,其實不然— 社運只係令你更清楚你身邊嘅人諗乜。真正令人分手嘅,源自於伴侶之間終於發現以往都未曾了解過嘅差異,而呢類野本身一直存在,只係大家都無任何契機發現。

或者我哋都會對香港未來不懷抱希望,但我相信過咗呢幾年,對香港人呢一個社群,或多或少都會有住一定嘅盼望。更好嘅愛情喺社群中滋長,令我哋都對生命更保持希冀,或者係延續香港人燈火嘅重要火苗。社會出現問題,我哋更加要喺條件限制下盡量活得更好,唔好俾政權所施加嘅外在條件去框限我地。

廣告

或者而家係一個更好嘅時候去搵一個人能夠「直視你嘅眼晴」,了解你嘅內心,為我哋追求公義嘅心築起一道城牆,不至被現實中嘅各種條件擊倒。「革命是為了更好的愛情」,除咗係代表革命成功後可以有更公義嘅社會環境,更代表革命過程中,我哋可以更清楚地看見彼此,搵到真正契合心靈嘅另一半。

講咗咁耐,都係為去唔到佢婚禮嘅岑敖暉高興,希望當香港光復時,能夠補飲到嗰杯喜酒。記得要幸福快樂!

廣告

作者 facebook 

發表意見