立場新聞 Stand News

張曉明係咪燉冬菇?

2020/2/14 — 16:58

張曉明

張曉明

【文:Mui Yuet Yan】

[利申先:我一直都睇好張曉明嘅仕途]

唔使開香檳住,表面上主任燉冬菇做副主任,但要睇埋細節:

廣告

「夏寶龍兼任國務院港澳事務辦公室主任;免去張曉明的國務院港澳事務辦公室主任職務,改任國務院港澳事務辦公室分管日常工作的副主任(正部長級);駱惠寧、傅自應兼任國務院港澳事務辦公室副主任。」

1. 接任人係夏寶龍,原浙江省委書記,現任全國政協副主席兼秘書長,簡單而言係再有副國級(國家領導人級別)做港澳辦主任,除咗廖暉主掌港澳辦(1997-2010)後期升任政協副主席,港澳辦作為直屬國務院嘅部委之一,主任都係正部級的規格。依家由本身已係副國級夏寶龍兼任,你可以當係人事上(暫時,但唔等於成為定制)將港澳辦規格升級咗。當然夏寶龍已經年屆 67,又是兼任,如果以本屆(第 13 屆)政協屆期去睇,基本上最長仲有 3 年任期。長遠港澳辦人事安排要再睇,但不期然就諗起之大約 2 年前都吹風吹得好行話港澳辦同國台辦合併,劉兆佳仲話「確定港澳辦和國務院台辦將不會單獨存在」。所以真係要留名。

廣告

2. 駱惠寧、傅自應兼任國務院港澳事務辦公室副主任,都係規格上嘅改變,2人都係正部級,連同夏寶龍、張曉明,港澳辦同時有 4 個正部級官員,而且除咗傅自應係候補中央委員,駱惠寧、張曉明都係中央委員,但有趣嘅係反而最高級嘅夏寶龍就唔係中央委員。十九大前夏寶龍又係退居二線,做全國人大環保委員會副主委(即係閒職),所以十九大無做中央委員,點知之後又返閹做政協副主席兼秘書長。

3. 隨任港澳辦規格提高,由主任轉做副主任嘅張曉明官階上似乎唔係降職,而且係「分管日常工作的副主任(正部長級)」,代表佢仍然維持正部級,而且「分管日常工作」,即係日常運作仍然由佢打點(諗起以前葉劍英都係以軍委副主席嘅身份主持軍委日常工作,當然那是主持而唔係分管,分管即係唔係主管總攬其成),而且重點係佢仍然維持佢最重要嘅職位:中共中央委員。一日係中委,一日都未玩完。長遠仕途就可能要睇 suppose 係 2022 年秋天召開嘅中共二十大,張曉明仲會唔會連任中委。但我一直都頗睇好張曉明嘅仕途。佢大學master一畢業就入港澳辦,長期擔任廖暉秘書,做咗 30 幾年港澳工作,依家先 56 歲(依家官場上呢個年紀正部級、已經有 1 屆候選中委、1 屆中委嘅履歷真係唔多人有),仲有大約 10 年玩,咁嘅履歷都幾難得,當然要再上就難啲(依家無主政一方嘅經驗,好難上副國級,反而我更睇好張曉明喺中聯辦嘅前任:彭清華,離任之後先後主政廣西同大省四川,已係 3 屆中央委員,如無意外 2 年後嘅二十大應該會再上一層樓)。

4. 另一個指標係比港澳辦高級嘅「中央港澳工作協調小組」,現時組長係國務院副總理韓正,副組長係政治局委員楊潔篪(外事掌門人)、尤權(中共中央書記處書記、中央統戰部部長)、王毅(國務委員、外交部部長)同趙克志 (國務委員兼公安部部長),成員係駱惠寧同傅自應。夏寶龍正常都會入小組擔任副組長,而張曉明應該由副組長變為組員。

5. 人事變動定期都會有,尤其係發生大事之後,反修例事件,中聯辦、港澳辦人事、規格有變動都係正常,改變方針、政策或者觀感都好,但都同我哋對於出事要問責下台嘅期望唔同。內地官場只要唔係犯政治錯誤或者泊錯碼頭、大樹靠山倒塌,基本長遠仕途都未必會好受影響,唔需要過度想像,所以張曉明應該仲有心情可以同十一哥賞櫻嘅。

作者 Facebook

發表意見