林彥邦

林彥邦

傳媒人,涉足報章、電台、電視,沉迷文字,喜愛說故事,希望成為擅長說故事的人。

2019/7/18 - 11:38

「張超雄又賣港啦!逃犯條例復活啦!」

資料圖片:張超雄

資料圖片:張超雄

「張超雄又賣港啦!逃犯條例復活啦!」

一睇標題嚇死人,事實上又其實唔係個回事 …

有小小複雜,不過又唔難明,坊間反對《逃犯條例》反對咗幾個月,其實呢個講法本身唔清楚,反對《逃犯條例》,事實上係反對《逃犯條例》「修訂」。

廣告

係「修訂」,唔係條條例本身,因為《逃犯條例》-《逃犯及刑事事宜相互法律協助法例》,從來都存在喺香港法例入面。

政府提出嘅「修訂」,主要有兩點:

一、移除「大陸、澳門、台灣以外」呢個地域限制
二、成個程序由立法會啟動,改為行政長官啟動

所以就變成,由行政長官送你中。

但係要留意,《逃犯條例》修訂「無」改到一點:

移交只係「單次性」,呢個寫法好核突,英文 case by case 好睇好多,無論你點改點修訂,都係 case by case(而同呢個 case by case 相反,係長期既司法互助)

即係點?即係張超雄提出嘅修訂,同樣都係單次性 … 呢一點其實係佢提出修訂嘅同時,已經包含在內。

咁就有人質疑,張超雄你個仆街,你咁改咪即係等香港同台灣可以移交逃犯,咁流亡去台灣啲人咪死?

啦咁樣,其實香港無論將條《逃犯條例》改到天花龍鳳都好啦,都係香港自己改,即係你可以寫條法例「全世界嘅人都要俾錢我」,都要人地真係會俾先得。

咁所以香港改完條例,第一,要同台灣簽協議,第二,香港要問台灣攞人又好、交人又好,「每一單」都要台灣同意先得 …

假設港府問台灣攞李倩怡同林榮基,「無論點」都要台灣同意先得 … 咁又可以話,吊,如果過兩年變咗韓國瑜咁點?其實如果真係變咗韓國瑜,佢隨時都可以即刻踢李倩怡同林榮基出境,踢佢地上機,真係連移交都唔使 …

其實呢個「移交一定要對家同意」,又係永恆定律嚟,就算簽咗長期司法協議,都要逐單逐單傾,捷克先岩岩拒絕咗大陸攞人要求。

另外,又見到有一話,如果「打開缺口」,條例包咗台灣,下次要再包埋大陸就好容易,呢個邏輯就好似話,你今日同美國簽完協議後打開缺口之後,下次再同亞努亞圖簽協議就會容易咗一樣 …

又好似有人話,一旦《逃犯條例》加咗台灣,香港接納「大陸法」之後,就會加速接納同樣行「大陸法」嘅中國大陸。

大哥,「大陸法」其實係「歐陸法系」嘅別稱,唔係「大陸嘅法例」咁解,德國、法國、西班牙、日本等等等等全部都係「大陸法」,又唔通你同德國簽完協議(事實上真係有簽),就會容易啲接納大陸套「陽光司法」咩 …