假才子

假才子

比較政治碩士學歷、傳媒工作者。取名「假才子」是因為潮流興才子才女,但又沒有人承認自己是假大空的偽才子才女,所以先行澄清。文章內容不好就還請見諒,畢竟我不是個正牌才子。

2020/7/24 - 15:22

強烈呼籲陳健波參加地區直選

圖片素材來源:立法會網頁截圖

圖片素材來源:立法會網頁截圖

瘋魔全城萬千收成期人士(下簡稱收成人),簡直是收成人指路明燈、大海舵手、人生摩西的收成界 KOL 陳健波,早前在 FB 上反駁沈大屍,再次狠批年輕人沒資格批評收成人,以攬炒破壞他們收成期,並強調不知幾多收成人支持佢,呼籲沈大屍不要顧住吹水呃 like 呃選票,走出吹水圈方有生路。

對此,不是收成人的筆者都認同到不得了。How dare you 沈大屍一個吹水佬,咩成就都未有,唔肯走出舒適圈,只識呃 like 呃選票,人生冇前途冇生路的後生仔,夠膽批評收成人。你唔係以為有牛津博士、做過大學教授、去勻全世界、FB 有 30 萬 like 就係咩成就呀。在冇讀過大學 (*)、FB 有 6 萬 like、食鹽多過你食米、咩大風浪大場面未見過、年紀大所以肯定識政治同有國際視野過你個後生仔(即使你係政治學/國際關係 PhD)、兩次 0 票當選、代表緊百幾個選民咁多的收成界摩西面前,你咩都唔係,佢一隻手指捽死你呀。

廣告

不過都要講返轉頭,我咁景仰陳健波,可惜無緣投票比佢表達我支持,頂多只可以在舒適圈 like 佢的片,其實我真係好恨有機會投票比佢。所以我強烈呼籲陳健波大師走出小圈子,參加地區直選,濟世為懷,普渡眾生。以佢在收成界咁高地位,千萬收成人當佢神咁拜,在選舉論壇上亦都可以掃低哂班攬炒泛暴派,迷途的年輕人相信亦好多會被佢感化(好似我咁),出來直選肯定橫掃千軍,注定會成為全港最高票,鄺俊宇拍幾廿個馬位都追唔上。陳健波,等緊你走出舒適圈,投票比你呀!

* 陳健波在立法會網頁上的履歷冇顯示讀過大學
 

作者 Medium