立場新聞 Stand News

心存僥倖的所謂精神領袖

2020/6/25 — 14:46

鄺保羅、釋寬運、湯漢、湯恩佳、薩智生、蘇成溢、梁德華

鄺保羅、釋寬運、湯漢、湯恩佳、薩智生、蘇成溢、梁德華

《黨職人員》
心存僥倖不關身,有神庇佑便關人。
拳頭在近忘史訓,天家路遠信黨恩。
空說人間存天國,且進魔間趁地腍。
拜得神多神眼瞓,打醒精神做黨針。

人從歷史中學到的教訓,就是人不會從歷史中吸取教訓。人類犯下的歷史錯誤,形式或有不同,但造成錯誤的原因基本上只是大同小異。大部份人都是如此,宗教領袖又如何?精神領袖又如何?

當年共產黨說過會如何公平對待民族資本及私人產業?但不消幾年,很多人就無端端被套上了「地主階級」、「富農」、「企業家」這些標籤,就連一些小本經營小店的老闆仔,很多都是被鬥垮鬥臭,財產充公,不少人被槍斃,後人就連家族企業的名號也被收歸國有或充公!

廣告

當年曾說,除了換面旗,一覺醒來就什麼都不變,中央只管國防外交。現在拿着一本基本法,就可以搞出不同的花樣。一本薄薄的基本法,就可以搞出七本字典厚的基本法解釋。正因為只是大原則,官員以為任佢點講點解釋都得,全都是穿鑿附會,子虛烏有,僭建權力!

去到今時今日,甚至是不理會基本法,「一國」大晒,話係就係!某個機構就話豁免,那一條就不適用!如果咁多例外,咁多豁免,仲使乜基本法!現在拿着一個虛假的偽命題「國家安全」,就可以胡作非為!次次都可以過到骨,原因就是有太多人識事務,要做俊傑!只求自保,唔關自己事,在權力面前就唯唯諾諾!

廣告

下一步會如果?真係唔關你事?咁搞落去,沒有人是安全的!肯定的是遲早會燒教堂!

不要以為這說法誇張!23 年之前,誰料到公務員會需要絕對忠誠於一個戇 Q 特首,你有份選佢咩?而家做得好好咩?俾隻豬,俾隻狗,俾件咁樣嘅林鄭你哋,十八萬人即刻冇咗自己個腦袋,都要絕對忠誠?呢啲唔係叫做侮辱你哋智慧,係不認為你哋應該有智慧!

食得皇家飯,就要做奴隸?要絕對忠誠,表達政治意見都會被紀律處分?人權保障包含的政治表達權仲有乜意義?公務員係唔係唔可以反對政府填海?住喺屯門嘅公務員係咪唔可以反對政府建議在哪裏設立垃圾焚化爐?係咪連捐錢比 612 基金,或者九月立法會選舉唔投票俾民建聯都會被紀律處分?依據痰要冲痰餵豬之流的邏輯,遲早會引申到咁樣嘅解釋!

有什麼法律依據說醫護人員不可以投票決定是否參與工業行動?一個副校長冇用到佢校長職銜,以私人的名義在一個簽名問運動中留下名字,就會被教育局追殺?學生搞人鏈表達反對校方無理解僱一位老師,教育局長竟然話可能會犯法!嘩!依家真係講乜都得,話你犯法就係犯法,話你唔忠誠係唔忠誠!

人係咪一旦被套入了某身份,所有作為人的基本尊嚴與元素都會被剝奪?答案明顯「唔係」!但而家那些權勢走狗係都要話就係咁樣!如果個個都唔出聲,如果個個都只係唯唯諾諾,如果個個都以為唔關我事,以為都未燒到埋我身,咁就關人唔理,甚至話得到少少口頭上嘅所謂承諾或者保證,就要幫埋手打邊鼓,咁好多嘢唔係都會變咗係!

而家已經開始搞啲老師,津校私校嘅老師都可能無一倖免。跟着下來,好快就會全面搞資助機構及法定機構的僱員!社工、全體醫護、大學教職員、機管局、考試局、再培訓局的僱員,甚至政府作為大股東的港鐵所有員工,全部要你哋向一隻豬、一隻狗、一個林鄭之類的物體絕對忠誠又有什麼出奇?再加上有很多機構管理高層,例如董事局,管理委員會之類,全部都係安插晒那些與政府同聲同氣嘅奴才入去。在這些機構及公營組織,用升職、加人工、續約、表現評估、紀律處分這類方法去剝奪你哋每個人嘅私人政治表達權及言論空間,相信已經為期不遠。

希望大家不要坐以待斃,不要等到打到埋身先對知唔知道已經冇還擊之力!

心存僥倖,以為自己唔關事,以為可以用支持政權暴力來換取自己甩身,這算是什麼宗教領袖應該有的大愛精神!現在不是有着精神領袖身份的宗教領袖自己走下神壇,他們是自己走進地獄為魔鬼打邊鼓!他們這樣做,不要再說什麼要建天國於人間了,是他們有份把人間變成地獄!

作者 Facebook

發表意見