立場新聞 Stand News

心黃與錢黃

2019/12/4 — 21:25

被視為支持抗爭運動「黃店」的龍門冰室,近日經常大排長龍。(資料圖片)

被視為支持抗爭運動「黃店」的龍門冰室,近日經常大排長龍。(資料圖片)

一,近來,見到唔少人講黃色經濟圈。我唔敢話大家捉錯用神,但唔講顏色之前,係咪要講下咩叫市場經濟(圈)呢?

二,市場經濟,咪就係「有供、有求、有交易」囉。當然,自我感覺良好,都係一種求。認同感,都係一種求。求,係主觀嘅,個人嘅,其他人唔認同,都真係無謂說三道四,呢個唔係咩法律道德問題,係識唔識做人咁解嗟。

三,即係話,你鍾意淨係幫趁黃店,你個人選擇;正如當年「愛國用國貨」一樣,都係個人選擇。

廣告

四,吾友 MyGut 者言 Kevin Tsui @ 經濟 3.0,早排寫過話可以嘗試用 blockchain 去做黃色經濟圈,吾友讚賞公民 Civic Liker Kin Ko 都有類似嘅講法。簡單講,理論上,假如黃圈經濟交易透過 blockchain 進行,就可以由源頭開始,睇晒個供應鏈入面有幾黃。即係話,黃色經濟嘅資訊成本,可以因此減低。其實,都有人提出用呢個方法去降低綠色經濟嘅資訊成本。

五,正所謂「萬惡淫為首,論跡不論心;論心世上無完人」。廿一世紀嘅萬惡,破壞環境都應該上榜。任何經濟活動對環境嘅影響,亦勉強都可以量度。做生意嘅人,就算唔係真心為環保,只要行為同結果有任何影響,就可以「有數得計」。所以,綠色經濟有一定客觀標準。

廣告

六,當然,要深入啲辯論例如「碳排放對地球生態平衡利多於弊」,都唔係唔得。你話依家嘅 global agenda 有冇主觀成份,我話你知一定有。但最終,理論上,都可以用事實去證偽,符合 Karl Popper 對科學嘅定義。又當然,最終大家信唔信又另一回事,正如真係有人真心相信地球係平嘅一樣。

七,綠同黃,概念上有個都幾根本嘅分別。首先,黃呢,係真係完全主觀嘅感覺,亦唔知點樣去度。唔通要店員店長做 questionnaire?從方法學角度,我個人都幾唔鍾意 questionnaire 呢啲好似做假嘅「偽科學」。

八,我不只一次講過,社會現象嘅探究,係哲學而唔係科學。社會科學呢家嘢,真係廿世紀學院派自貶身價而媚俗嘅代表作。唔離題,搵日再講呢題目。

九,行為可以計,可以量,可以分析。不過,睇一個人黃唔黃,唔通要核實佢有冇投票,投邊個?某程度上,連呢樣其實都可以做假。再講,這樣做是不對的。

十,重點係,由價值觀同信念,到個人行為,到社會現象,並唔係咁簡單嘅加法(summation) 。尤其係價值觀同信念(主觀)到個人行為(客觀),就更加係複雜。

十一,吾友 Byron Tsang 曾國平教授近來好積極咁去將《國富論》通俗普及化。《國富論》裡面最為人津津樂道嘅一個講法就係:肉類分割員同麵包師傅,唔係咩大愛膠,但自利之下,最終都會 #利世民 🙏

十二,即係話,有啲人未必係「心黃」,但結果又幫到香港嘅民主自由。有啲人可能「心黃」,但做出來嘅嘢又好幫到忙,點計呢又?

十三,又正所謂「百行孝為先,原心不原跡;原跡窮家無孝子。」即係,黃,係一個心,有心就夠。

十四,我認,我對黃色經濟潑冷水,都係一種「原跡不原心」嘅矛盾。所以,黃色消費作為一個自我感覺良好嘅行為,大家覺得舒服就算數。不過,我又覺得自己應該提醒下大家,其實除此以外作用有限。

十五,另一點,正如一開始提出,究竟咩係「經濟圈」呢?一班人自己供、求、交易?但唔好唔記得,市場係透過競爭同合作,淘汰同演進,去「利世民」。即係話,如果好多人因為一間店夠「黃」就幫趁,結果會多咗商號黃到出面,咁,都未嘗唔係一件好事,亦都係呢場運動嘅目的。

十六,不過,更高層次去睇,畢竟經濟就係「透過將資源組合分配,盡量滿足需求」,所以黃色經濟要質素同效率都完勝,場運動先至可持續發展。

十七,用其他「政治 × 消費」去分析,大家可能會抽離少少。即係,咩「愛國用國貨」,假如國貨質素唔夠好,冇世界級競爭力,生產同物流運輸成本高,你可以撐幾耐,犧牲幾多?因為政治而非理性消費,你唔係懲罰緊任何人,你係懲罪自己。

十八,「有啲黃店好好食㗎!」咁,你係理性消費者,恭喜你。不過,邏輯上,黃唔黃,你都幫趁㗎啦。【後補:睇到呢度,如果你仍然堅持黃色經濟,我唯一嘅建議就係,大家要對黃店有更高嘅要求!】

十九,正如你唔駛理我黃唔黃,只要睇完覺得認同,咪 Like and Share 囉。【後補:即係我都唔介意大家對我有更高要求,我自己對自己都係。】

二十,記住,當你消費政治,其實你亦都畀政治消費。之前都有寫過呢個題目,重溫舊帖

廿一,當然,仲有我同「古天后炒股日記」嘅第一集 YouTube 都係呢個題目:

 

作者 Facebook

發表意見