立場新聞 Stand News

成立口罩互助會,就可拉特首下台!

2020/2/16 — 10:22

上一回講到我因為撲口罩而諗到立法會奪半嘅方法〈立法會奪半的最後拼圖,原來只需教中小企咁做!〉,口罩嘅故事未完㗎,仲可以幫民主派贏特首選舉添!方法就是成立「口罩互助會」。

嗱,即係咁,大家日日好似睇住個股市咁留意港九新界嘅口罩行情,反正都已經有唔少群組互相幫忙買口罩同物資啦,不如直頭成立返啲口罩呀、酒精呀、洗手液呀之類嘅互助會呢?如果你喜歡,你可以同時成立哂咁多個,都絕係合理、合情、合法嘅!重點係:記住向職工會登記局登記!最理想的是,由中小企老闆鼓勵下屬去做,咁就快手有效率,可以在明年的特首選委的選舉,加入其中最關鍵的勞工界(60 席)投票,每個互助會有一票,而目前建制只係贏大約 250 票。但要快手!因為跟大部分界別一樣,規定要一年前行動才有投票資格,即係宜家!截止日期是 5 月 2 日,但預埋職工會登記局嘅處理時間,大概一個月,請至少在 4 月 2 日或之前成立。如果老闆無鼓勵你成立也沒相干,因為其實唔需要老闆批准,甚至唔需要通知佢,只需要湊夠 7 個打工仔,相同行業或職業(不必同公司),填 form/template 登記就搞掂。如果中共欽點的特首(唔理仲係咪林鄭)在選舉敗給「口罩互助會」,係咪好諷刺、好爽呢?

咪住,勞工界 60 席攞埋都未夠數!係㗎,但已經足夠令 777(或繼任人啦)剛好唔夠數。詳情請看〈變天最關鍵的特首選委界別,唔夠四個月就靜靜輸了!〉,內文除了講勞工界的參加辦法,仲講加埋某些關鍵界別就夠數啦。

廣告

如果嫌唔夠穩陣,睇埋較詳盡的〈換特首只需四萬素人新血,三個月截止〉,尤其推薦畀中小企老闆,因為好多界別係今年 5 月前加入乜乜商會就有資格做選民,但登記或投票嘅人只得 10% 或更少,好多人根本唔知參加嘅方法。如果嫌太長太多界別,就睇〈終極懶人包 — 全民湧進小圈子選舉攻略,剩返唔夠三個月〉

根據沈旭暉嘅鴻文〈淺藍戰線 光復香港 你們才是最大贏家〉,只要民主派贏到特首選舉一次,由於行政主導、特首權力極大,就有若干法律罅可以爭取到民主!

廣告

除了立法會,別忘了特首選委,行動既截止時間係一樣!極需要打工仔同中小企立即行動!

選民登記截止日期
更改界別(包括超區):4 月 2 日
全新登記(個人/團體):5 月 2 日

 

發表意見