何桂藍

何桂藍

前《立場新聞》記者、英國廣播公司(BBC)多媒體記者。「若不在香港自由,則自由又有何義。」Facebook:https://www.fb.com/gwynethhokl

2021/2/26 - 13:02

「我們只是,普通得不能再普通的中大學生」

希望大家都能花點時間,看一看中大學生會內閣「朔夜」的記者會直播

獲中大近 4000 票支持卻被校方一頁聲明 DQ 的當選中大學生會內閣「朔夜」,在聲明刊出三小時後、凌晨 12 點開記者會回應,兩度向選民鞠躬致歉。候任會長林睿晞首先感謝傳媒深夜入中大,因為「唔知聽朝,我哋仲有冇機會喺呢度,同大家開記者會」。

不知有沒有人會覺得「嘩,使唔使講到咁誇張」?Well,喺一個曾經打開校門畀警察入校、報國安嚟拉無名學生嘅大學,佢出得個咁嘅聲明,下一步可以做到幾癲,邊個知?(或者大家都知,但真係好難面對)

廣告

林睿晞是一個會被莊員取笑為「死左膠」的和理非。冇錯,今日香港,無論你講嘅嘢係激進定溫和,只要你夠膽企出嚟,只要你夠膽講嘢,就要面對「唔知聽朝六點打後自己會唔會國安法拘捕上庭還柙直落」的可能性。

而這個內閣想做的,只是「堅守選舉承諾……好似我哋以前 promise 過咁樣,去 serve 中大同學」。

面對記者「有沒有後續行動」的提問,甚至「妥協」的定性,副會長何思珩在記者會上哽咽,坦承對改變結果已無期待,但仍希望中大學生可以再次證明「朔夜」是獲中大學生支持、承認的民意代表﹙容我逐字引述如下﹚:

「希望做一份聯署,希望咁多位中大同學可以幫吓我哋。我哋都係因為好鍾意中大,所以出嚟選。相信我哋都係同咁多位中大同學一樣,有個身份認同喺度。份聯署可能到最後冇咩用,但係都可以表現到有同學支持我哋,同埋我哋應該係冇做錯嘅。

都係一個發聲嚟,我哋冇期望有咩轉變,但我哋都只係想有呢樣嘢出現,等大家知道,我哋都真係有認受性,都真係屬於中大。 」

比起匿喺電腦後出份聲明就當講咗嘢,用鍵盤打幾隻字、就遞奪中大學生投票選出嘅學生會嘅中大校方、比起連「朔夜」政綱邊一條邊一句政綱違法,都唔夠膽交代﹙因為根本冇﹚,莫須有就 DQ 民選學生會嘅中大校方,究竟是哪一邊更加勇敢?

但更為難得的,是「朔夜」面對「之後會點先?」的質疑,選擇坦誠自身的困難:

何思珩:「我哋會因為校方份聲明咁 surprise、唔能夠應對嘅原因,其中一個原因係因為在座 12 個人出嚟,已經唔係好似過往嘅內閣咁……有勇氣?咁…能夠無底線地去做一啲工作。喺呢個亂世之中,我哋 12 個絕對唔係有勇氣嘅一班人。」

「歷屆嘅中大學生會行得更加前、做得更加多嘢,我哋冇諗過會有呢份聲明,正正就係因為我哋嘅政網、參選理念,絕對唔係行得前嘅一班人,我哋每個人亦都自問,有好多唔同嘅考慮、唔同嘅人生方針,未必能夠做到前人所做嘅嗰套。冇諗過咁樣都會有今日咁嘅懲罰。」

林睿晞:「我哋亦都相信,今次打壓後,我哋嘅空間亦都會再縮細,講唔到我哋會做咩、唔會做咩,因為呢個時候掌有控制權、當權嘅,並唔係我哋,我哋只係一班希望服務中大同學嘅學生,一班普通到不能再普通嘅學生。面對咁嘅情況,我哋做嘅嘢好多時候都係受校方、受呢個政權所控制。所以我實在講唔到,我哋嚟緊有啲乜嘢真係做到或者做唔到。但係我哋會盡全力,呢個係我哋對於 4000 名有份投票畀我哋,同 1 萬 8 千位中大學生嘅承諾……

喺咁嘅環境底下,我哋唔能夠百份百做到前人做嘅嘢,呢樣亦都係我哋覺得好對唔住選民嘅嘢。我哋本身參選嘅初衷,就係想喺無何奈何之下,都仍然繼續企出嚟,希望喺朔月無光嘅時間,畀中大同學睇到,仍然有人願意企出嚟,繼續撐落去。」

在此只想向「朔夜」的同學、也向任何認為「乜料咁溫和」的旁觀者說,勇氣不僅僅由具體行動去量度。前人身處的政治環境,又豈可與今日同語?甚麼是「行得前」、甚麼是「有勇氣」,都已經有了新的意義。值此時勢、面對這樣的威脅,仍願意以一己之力去抵抗洪流,所需的勇氣難道不是更加大?

而願意在艱難時刻,向選民、中大人、以至世界坦誠以對,我希望…不,我相信,並不會令人感到頹喪﹙反正現實,是大家都知道的﹚,而會從朔夜 12人自知乏力、自知躊躇仍敢於踏前這一步的勇氣,而確切地看得見,此城究竟有幾多人、普通得不能再普通的人,即使畏懼、即使力量微小,仍然作出決定,要在大家未必覺察的角落,盡獻著自己的一切。

哪怕自己,要因此而面對殘酷的後果。

作者 Facebook